Avropa Birliyinin maliyyələşdirdiyi “Erasmus+” KA2 proqramı üzrə həyata keçirilən “Nəqliyyat xidmətləri üçün risk və böhran mühəndisliyi” (CRENG) layihəsi çərçivəsində onlayn master-klas dərsləri keçirilib. 4 gün ərzində keçirilən master-klas dərslərində Azərbaycan Texniki Universitetinin (AzTU) Nəqliyyat logistikası və hərəkətin təhlükəsizliyi kafedrasının, Logistika və Nəqliyyat İnstitutunun əməkdaşları, həmçinin magistratura və doktorantura tələbələri iştirak edib.  Dərslər fəlakət vəziyyətlərində humanitar logistika və nəqliyyat xidmətləri, logistika sistemlərinin modelləşdirilməsi üzrə “AnyLogic”, qlobal depolama sistemlərində müasir problemlər, qlobal  nəqliyyat sistemində yükün iki və ya daha çox nəqliyyat vasitəsilə daşınmasında irəliləyişlər, riskin və böhranın proqnozlaşdırılması və s. mövzuları əhatə edib. Sonda müstəqil auditorun iştirakı ilə layihənin ümumi monitorinqi keçirilib.

Azərbaycan Texniki Universitetinin (AzTU) tərəfdaşı olduğu "Erasmus+" KA2 “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” layihəsi (UniClaD) çərçivəsində növbəti menecment görüşü keçirilib. Litvanın Kaunas Tətbiqi Elmlər Universitetinin koordinatorluğu ilə keçirilən görüşdə layihənin tərəfdaşları tərəfindən görülən işlər haqqında məlumat verib, qarşıda duran vəzifələrlə bağlı müzakirələr aparılıb.  Layihə çərçivəsində ekspert mərkəzlərinin fəaliyyətinin təşkili və pilot layihələrin işlənməsi ilə bağlı görülən işlərin hesabatı dinlənilib. Komanda heyətinin, magistrant və doktorant tələbələrin Avropa ölkələrinə öyrədici səfərlərinin həyata keçirilməsi üçün müəyyən edilmiş vaxt qrafiki tərəfdaşlara təqdim edilib. Qeyd olunub ki, layihə üzrə əlavə tədris materiallarının hazırlanması nəzərdə tutulub. Bununla bağlı 3 mövzu müəyyən olunaraq işlənilməsinə başlanılıb. O da bildirilib ki, layihə çərçivəsində 21 fevral 2022-ci ildə tərəfdaş universitetlərin geniş tərkibdə nümayəndələrinin iştirakı ilə “Yaşıl pedaqogika” mövzusunda seminar keçiriləcək.  Görüşdə 25-29 aprel 2022–ci il tarixlərində 8 tərəfdaş ökədən 24 təşkilatın 60 nəfərədək nümayəndənin iştirakı ilə Azərbaycan Texniki Universitetində (Bakı) rəhbər komitə iclasının və Azərbaycan Dövlət Aqrar Universitetində (Gəncə) beynəlxalq konfrasın keçirilməsi ilə əlaqədar səfər hazırlıqları da müzakirə olunub. Sonda tərəfdaşların sualları cavablandırılıb.   

Avropa İttifaqının maliyyə dəstəyi ilə həyata keçirilən Azərbaycan Texniki Universitetinin (AzTU) tərəfdaşı olduğu "Erasmus+" KA2 proqramı çərçivəsində “Azərbaycanda Rektorlar konfransının yaradılması” (ECAR) layihəsi üzrə təlimlərə başlanılıb.  “Strateji planlaşdırma və idarəetmə” mövzusunda keçirilən ikigünlük təlimdə AzTU-nun rektorunun elmi-tədqiqat məsələləri üzrə müşaviri  Fariz Məmmədov iştirak edib.   Təlimin ilk günündə strateji planlaşdırmanın əhəmiyyəti, planlaşdırmanın üsulları və metodları, maraqlı tərəflərin prosesə cəlb edilməsi, missiya, vizyon və dəyərlərin müəyyən edilməsi, büdcənin hazırlanması üzrə müzakirələr aparılıb. Təlimin növbəti günündə performansın idarə olunmasının müasir üsulları və formaları, yüksək performanslı komanda işinə nail olmaq üçün çevik idarəetmə yanaşması, onun əsas prinsipləri, eləcə də risklərin təhlili və idarəedilməsi ilə bağlı məlumatlar verilib. İştirakçıların strateji planlaşdırma üzrə komandalar şəklində təqdimatı da təlimin ikinci günü həyata keçirilib. Sonda təlim iştirakçılarına setitifikat və hədiyyələr təqdim edilib. Qeyd edək ki, layihə çərçivəsində növbəti təlim 24-25 fevral tarixlərində “Dəyişikliklərin idarə edilməsi” mövzusunda keçiriləcək.   

Azərbaycan Texniki Univeristetinin (AzTU) tərəfdaşı olduğu Erasmus+ KA2 proqramı çərçivəsində yerinə yetirilən “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti, risklərin idarə olunması üzrə açıq və distant təhsil formatında peşə bakalavrı, peşə magistri hazırlığı” (LMQS) layihəsi davam edir. Layihənin Avropadan olan eksperti, professor Jean Noel Pachoud Azərbaycanın LMQS üzrə tərəfdaş qurumlarına bir həftəlik səfər edib. AzTU-nun rektoru Vilayət Vəliyevlə görüşən Jean Noel Pachoud layihə çərçivəsində görülən işlər və perspektiv əməkdaşlıq istiqamətlərindən danışıb. Yeni “Menecment” (səhiyyədə keyfiyyətin və risklərin idarə olunması) ixtisasının perspektiv imkanları barədə də müzakirələr aparılıb. Daha sonra qonaq AzTU-nun İqtisadiyyat və idarəetmə fakültəsinin profesor-müəllim heyəti ilə görüşüb. Görüşdə çıxış edən beynəlxalq əlaqələr üzrə prorektor Sübhan Namazov layihənin əhəmiyyəti və görülən işlər barədə məlumat verib. Layihə üzrə görülən işlər, yeni açılacaq “Menecment” (səhiyyədə keyfiyyətin və risklərin idarə olunması) ixtisasının tədris proqramı da ekspertin iştirakı ilə müzakirə olunub.  O da qeyd olunub ki, ekspertin səfəri çərçivəsində AzTU və digər tərəfdaş universitetlərdə layihənin işçi komandası ilə görüşlərin keçirilməsi və yeni yaradılacaq ixtisas üzrə tədris planının hazırlanmasına həsr olunan işçi seminarların keçiriməsi nəzərdə tutulub. Seminarda professor-müəllim heyətinin sualları cavablandırılıb. 

Azərbaycan Texniki Universitetinin (AzTU) tərəfdaşı olduğu Erasmus+ KA2 proqramı çərçivəsində həyata keçirilən “Azərbaycanda Rektorlar Konfransının yaradılması” (ECAR) layihəsi üzrə növbəti görüş keçirilib. Görüşdə Təhsil Nazirliyinin Elm, ali və orta ixtisas təhsili şöbəsinin müdiri Nicat Məmmədli, həmçinin layihə konsorsiumunun üzvü olan Azərbaycanın 16 ali təhsil müəssisəsinin prorektorları və məsul şəxsləri iştirak edib.  Tədbirdə AzTU-nu sosial məsələlər və ictimaiyyətlə əlaqələr üzrə prorektoru Kamran Rəsulov və Xarici əlaqələr şöbəsinin müdiri Orxan Vətənxah təmsil edib. Əvvəlcə layihə üzrə yerinə yetirilmiş işlərin nəticələri haqqında məlumat verilib. Qeyd olunub ki, növbəti mərhələdə Rektorlar Konfransının Azərbaycan modelinin yaradılması məqsədilə işçi qrupu formalaşdırılacaq, həmçinin layihənin təşkilati strukturu, missiyası, üzvlük qaydaları, maliyyələşmə mexanizmləri və onun tərkibində fəaliyyət göstərəcək komitələrin yaradılması haqqında bir sıra sənədlər hazırlanacaq.

Azərbaycan Texniki Universitetinin (AzTU) tərəfdaşı olduğu Erasmus+ KA2 proqramı çərçivəsində həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” (UniClaD) layihəsi üzrə onlayn formatda menecment görüşü keçirilib. Litvanın Kaunas Tətbiqi Elmlər Universitetinin koordinatorluğu ilə təşkil olunan görüşdə layihə üzrə fəaliyyətlərin işlənməsi və maliyyəsi ilə bağlı məlumat verilib. Həmçinin layihənin subkomponentlərinin, o cümlədən ekspert mərkəzlərinin yaradılması, fəaliyyətlərin təşkili, pilot layihələrin işlənilməsi vəziyyəti, öyrədici səfərlərin və tələbə mobilliyinin planlaşdırılması, təlim modullarının işlənilməsi ilə bağlı müzakirə aparılıb. Görüşdə layihə üzrə məlumatlılığın artırılması komponenti üzrə görüləcək işlər geniş təqdimatda müzakirə olunub, fəaliyyətlərin rəqəmsallaşdırılması məqsədilə layihə məlumatlarının QR kodu tərəfdaşalara təqdim edilib. Qeyd edilib ki, layihə çərçivəsində 2022-ci il fevralın 21-də tərəfdaş universitelərin nümayəndələrinin iştirakı ilə “Yaşıl pedaqogika” mövzusunda seminarın keçirilməsi planlaşdırılır. Görüşün sonunda tərəfdaşların sualları cavablandırlıb.

Təhsil Nazirliyinin “Ali və orta ixtisas təhsilinin 2021/2022-ci illər üzrə inkişafı” mövzusunda  keçirdiyi qrant müsabiqəsi üzrə Azərbaycan Texniki Universitetinin (AzTU) qalib olduğu layihənin icrası ilə bağlı ilk görüş keçirilib.  Görüşdə AzTU-nun layihə üzrə komanda heyəti, Azərbaycan Respublikasının Təhsil İnstitutunun (ARTİ) və Təhsildə Keyfiyyət Təminatı Agentliyinin (TKTA) nümayəndələri iştirak edib.  “AzTU-da prioritet mühəndislik ixtisasları üzrə professor-müəllim heyətinin akademik mobilliyinin səmərəli təşkili ilə elmi potensialın gücləndirilməsi və yüksək ixtisaslı kadr hazırlığının təmin olunması mexanizminin yaradılması” layihəsi mobillik yolu ilə professor-müəllim heyətinin elmi potensialını artırmağı nəzərdə tutur.   Görüşdə layihənin konsepti, komponentləri üzrə mövcud və qarşıda duran məqsəd və vəzifələri müzakirə olunub. Həmçinin layihədən gözlənilən nəticələr haqqında tərəfdaşlara ətraflı məlumat verilib.   

Azərbaycan Texniki Univeristetinin (AzTU) tərəfdaşı olduğu Erasmus+ KA2 proqramı çərçivəsində yerinə yetirilən “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti, risklərin idarə olunması üzrə açıq və distant təhsil formatında peşə bakalavrı, peşə magistr hazırlığı” (LMQS) layihəsi üzrə təlimlərə start verilib.   Təlimlər layihənin koordinatoru Qərbi Attika Universitetinin  təşkilatçılığı ilə Yunanıstanın Afina şəhərində keçirilir.  Tədbirdə AzTU-nu Beynəlxalq əlaqələr üzrə prorektor Sübhan Namazov, rektorun müşaviri Fariz Məmmədov və layihənin əlaqələndiricisi, professor Həsən Hüseynov təmsil edir. Təlimdə Azərbaycanda menecment (səhiyyə xidmətlərində keyfiyyətin idarə olunması) ixtisaslaşması üzrə yeni magistr proqramının yaradılması ilə bağlı Avropa təcrübəsi öyrənilir. Eyni zamanda, bu sahədə müasir təcrübənin ölkəmizdə tətbiqi üçün Avropada səhiyyə xidmətlərinin keyfiyyətinə nəzarət, onun qiymətləndirilməsi, sertifikatlaşdırılması və səmərəliliyinin müəyyən edilməsi metodlarının öyrənilməsi və tədris prosesində tətbiqi istiqamətində müzakirələr aparılır. Təlim və müzakirələrdə Azərbaycandan layihənin tərəfdaş universitetləri olan İ.M.Seçenov adına Birinci Moskva Dövlət Tibb Universitetinin Bakı filialı və Naxçıvan Dövlət Universitetinin nümayəndələri də iştirak edirlər.

Azərbaycan Texniki Universitetinin (AzTU) tərəfdaşı olduğu Avropa İttifaqının maliyyə dəstəyi ilə həyata keçirilən “Azərbaycanda Rektorlar Konfransının yaradılması” layihəsi üzrə 2-ci komponentin icrasına başlanılıb. 2-ci komponent Avropada Rektorlar Konfrası təcrübəsinin öyrənilməsinə həsr edilib və bu məqsədlə universitet nümayəndələrindən ibarət  30 nəfərlik koordinasiya komitəsi yaradılıb. İlk olaraq Fransa Rektorlar Konfransı təcrübəsinin öyrənilməsi üçün təlimlərə başlanılıb. Təlimlərdə AzTU-nun beynəlxalq əlaqələr üzrə prorektoru Sübhan Namazov iştirak edir. 22-26 noyabr tarixlərində təşkil edilən təlimlər Fransa Rektorlar Konfransı (CPU) və Fransa Beynəlxalq Təhsil Mərkəzinin (FEİ) təşkilatçılığı ilə həyata keçirilir. Təlimlərdə Fransa təhsil sistemi və Fransa Rektorlar Konfransının ali təhsildə rolu, Fransa Rektorlar Konfransının təşkilati strukturu, maliyyələşmə mexanizmi, üzvlük qaydaları, strateji məqsədləri, beynəlxalq əlaqələri və CPU-nun digər maraqlı tərəfdaşlarla əməkdalığı haqqında iştirakçılara ətraflı məlumatın verilməsi planlaşdırılır. Səfərin sonunda təlim iştirakçılarının CPU-nun universitetlərlə qarşılıqlı əməkdaşlığının öyrənilməsi məqsədilə Sarbon Universitetinə səfəri nəzərdə tutulur. Xatırladaq ki, layihə Avropa İttifaqının maliyyə dəstəyi ilə Erasmus+ KA2 proqramı çərçivəsində həyata keçirilir.

Avropa İttifaqının maliyyə dəstəyi ilə həyata keçirilən Azərbaycan Texniki Universitetinin (AzTU) tərəfdaş olduğu Erasmus+ KA2 proqramı çərçivəsində “Azərbaycanda Rektorlar Konfransının yaradılması” (ECAR) layihəsi üzrə 1-ci komponentin yekunlarının təqdimatı keçirilib.   Tədbirdə 6 aylıq intensiv tədqiqat, araşdırma və təhlillərin nəticəsi tərəfdaşlara təqdim olunub. Təqdimat mərasimində Təhsil Nazirliyinin Elm, ali və orta ixtisas təhsili şöbəsinin müdiri Nicat Məmmədli, Azərbaycanın 19 universitetinin rektor və ya prorektorları, Milli Erasmus+ Ofisinin rəhbəri Pərviz Bağırov, layihənin xarici tərəfdaşları qismində Polşa Rektorlar Konfransının, Litvanın Mykolas Romeris Universitetinin, İsveçin Kral Texnologiya Universitetinin, Belçikanın EFMD–Biznes Universitetlər Assosiyasiyasının məsul nümayəndələri iştirak edib. AzTU-nu təqdimatda beynəlxalq əlaqələr üzrə prorektor Sübhan Namazov təmsil edib. Qeyd olunub ki, tədqiqat və araşdırma mərhələsində təhsil sahəsində maraqlı tərəflərin iştirakı ilə geniş həcmli sorğular və fokus qrup müsahibələri keçirilib. Daha sonra isə bu sahədə beynəlxalq təcrübə öyrənilərək kəmiyyət və keyfiyyət təhlilləri aparılıb.