Azərbaycan Texniki Universitetinin (AzTU) məzunu, Vətən müharibəsində şəhidlik zirvəsinə yüksələn Murad Məmmədov 7 dekabr 1995-ci ildə Sumqayıt şəhərində anadan olub.  O, 2013-2018-ci illərdə AzTU-nun elektroenergetika mühəndisliyi ixtisasında təhsil alıb. Ali təhsilini başa vurduqdan sonra Murad Məmmədov hərbi xidmətə yollanıb. Hərbi xidmətdən qayıtdıqdan sonra “Azərişıq” ASC-də mühəndis vəzifəsində işləyib. Qardaşının Vətən müharibəsində iştirak etməsinə baxmayaraq o özü də könüllü olaraq müharibədə iştirak üçün müraciət edib. Murad Məmmədov oktyabrın 25-də Qubadlının azad olunması uğrunda gedən döyüşlərdə şəhidlik zirvəsinə yüksəlib. Prezident İlham Əliyevin sərəncamlarına əsasən, Murad Məmmədov ölümündən sonra “Vətən uğrunda” və “Laçının azad olunmasına görə” medalları ilə təltif olunub. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!  

 Azərbaycan Texniki Universitetində (AzTU) Azərbaycan Dövlət Himninin müəllifi, maarifçi, tərcüməçi, pedaqoq və görkəmli ictimai xadim Əhməd Cavadın 130 illik yubileyi münasibətilə tədbir keçirilib. Tədbirdə AzTU-nun rektoru Vilayət Vəliyev, tarix elmləri doktoru, professor Nəsiman Yaqublu, universitetin tələbə və müəllimləri, həmçinin Əhməd Cavadın nəvəsi Almas Axundzadə, nəticələri Cavad Axundzadə və Mahmud Bağırov iştirak ediblər. Əvvəlcə Əhməd Cavadın müəllifi olduğu Azərbaycan Dövlət Himni səsləndirilib. Daha sonra çıxış edən AzTU-nun rektoru Vilayət Vəliyev bildirib ki, Əhməd Cavad Azərbaycan ədəbiyyatı tarixində özünəməxsus dəst-xətti ilə seçilən, müstəsna mövqeyə malik şəxsiyyətlərdən biri idi. Rektor deyib ki, gənclərin vətənpərvərlik ruhunda böyüməsində Əhməd Cavad yaradıcılığının böyük rolu var.  Azərbaycançılıq, türkçülük ideyaları, türk xalqlarının birliyinə çağırış kimi mövzular Əhməd Cavad yaradıcılığının əsasını təşkil edib. Vilayət Vəliyev Əhməd Cavad kimi ədiblərin hər zaman minnətdarlıqla xatırlanacağını bildirib. Tarix elmləri doktoru, professor, Əhməd Cavad haqqında yazılan ilk kitabın müəllifi Nəsiman Yaqublu görkəmli ədibin yaradıcılığından danışıb. Qeyd edib ki, üçrəngli bayrağımız haqqında ilk şeirlərin müəllifi olan Əhməd Cavad tarixdə istiqlal şairi kimi tanınıb. Təəssüf ki, dövrün parlaq şəxsiyyətləri sırasında olan Əhməd Cavad 1930-cu illərin ağır repressiyalarına məruz qalıb və sovet totalitarizminin qurbanına çevrilib. Əhməd Cavadın ailəsi adından çıxış edən nəticəsi Cavad Axundzadə ədibin irsini yaşatdığına, onun yubileyinin dövlət səviyyəsində qeyd olunması ilə bağlı sərəncam imzaladığına görə Azərbaycan Prezidenti İlham Əliyevə təşəkkür edib. Bildirib ki, Əhməd Cavad Dövlət Himninin müəllifi kimi adını Azərbaycan tarixinə qızıl hərflərlə yazdırıb. Cavad Axundzadə milli mübarizəyə, istiqlala xidmət edən Əhməd Cavad irsinin Azərbaycanda yaşadıldığı qədər, qardaş Türkiyədə də dəyərləndirildiyini deyib. O, Əhməd Cavadın türk dünyasında məşhur olan şeirlərindən misralar səsləndirib.    Çıxışlardan sonra Əhməd Cavadın 130 illik yubileyinə həsr olunan esse müsabiqəsinin qalibləri mükafatlandırılıb. Tədbir tələbələrin ifasında Əhməd Cavadın şeirləri və şeirlərinə yazılmış mahnıların səsləndirilməsi ilə davam edib. 

Xəbər verdiyimiz kimi, Nazirlər Kabinetinin “Şəhərdaxili hərəkət (mobillik) planının hazırlanması Qaydası”nın təsdiq edilməsi haqqında 22.01.2022-ci il tarixli 25 №-li Sərəncamının icrasının təmin olunması istiqamətində Azərbaycan Texniki Universitetində (AzTU) tədqiqatların aparılması davam etdirilir. Sərəncamın icrası çərçivəsində AzTU-da Bakı, Gəncə və Sumqayıt şəhərləri istisna olmaqla, digər 16 şəhərdə mobillik planının həyata keçirilməsi istiqamətində işlər aparılır. Planın icrasının təmin olunması məqsədilə şəhər nəqliyyat sisteminin inkişafı üçün nəqliyyat və nəqliyyat-sosioloji vəziyyətin təhlilinə (nəqliyyat və marşrut şəbəkəsinin monitorinqi – avtobus marşrutlarında sahələr üzrə sərnişinlərin sayılması, yol ayrıclarında intensivlik və işıqforların iş rejiminin müəyyən edilməsi və s.) dair ilkin verilənlər (data) toplanılır. İlkin mərhələdə Nəqliyyat və logistika fakütəsinin bakalavr və M151aB, M161a3 qruplarında təhsil alan tələbələri 14 noyabr – 2 dekabr 2022-ci il tarixlərində Şəmkir, Yevlax və Naftalan şəhərlərində aparılan sorğu və monitorinqlərə cəlb edilib. Hazırda nəticələrin emalı və təhlillərin aparılması davam etdirilir. Qeyd edək ki, layihə üzrə işləri AzTU-nun Logistika və Nəqliyyat İnstitutu ilə Universitet-Sənaye Əməkdaşlığı və Ömürboyu Təhsil Mərkəzi birgə həyata keçirir.    

Azərbaycan Texniki Universitetinin (AzTU) Maşınqayırma texnologiyası kafedrasının keçmiş dosenti Ümid Yusif 85 yaşında vəfat edib. AzTU-nun rəhbərliyi və kollektivi Ümid Yusifin vəfatından kədərlənir, ailəsinə və yaxınlarına başsağlığı verir. Allah rəhmət eləsin!

Brandenburq Texniki Universitetinin (BTU) professoru, Azərbaycan Texniki Universitetinin (AzTU) fəxri doktoru Sylvio Simon Maşınqayırma və robototexnika fakültəsinin tərkibində yaradılan alman dili qrupunda təhsil alan tələbələrlə görüşüb. Görüşdə tələbələrə BTU haqqında ətraflı məlumat verilib. Qeyd olunub ki, AzTU-nun Maşınqayırma və robototexnika fakültəsinin tərkibində yaradılan alman dili qrupunda təhsil alan tələbələr BTU-da təcrübə keçmək, həmçinin Avropa İttifaqının “Erasmus+” mübadilə proqramı çərçivəsində 1 semestr ərzində təhsil almaq, gələcəkdə magistratura səviyyəsində tədrisi davam etdirmək, konfranslarda və yay məktəblərində iştirak etmək və s. imkanlardan yararlana bilərlər. Alman dili səviyyələri yüksək olduğu üçün, bu qrupda təhsil alan tələbələr müstəqil olaraq Alman Akademik Mübadilə Xidmətinin (DAAD) təqaüd proqramlarında iştirak edə bilərlər. Görüşün sonunda tələbələrin sualları cavablandırılıb. 

Azərbaycan Texniki Universitetinin (AzTU) SABAH qruplarının nəzdində yaradılmış “IT Woman Club” və “IT Brains Academy”nin birgə təşkilatçılığı ilə “İT sahəsində ilk addımlar” adlı təlimin açılış mərasimi keçirilib. Tədbirdə çıxış edən AzTU-nun rəqəmsallaşma və layihələr üzrə prorektoru Rəşad Əliyev İT, proqramlaşdırma, rəqəmsal marketinq və SMM sahələrinin müasir dövrdə vacibliyindən danışıb. O, bu istiqamətdə təhsil alan, biliklərini daim inkişaf etdirən gənclərə uğurlar arzulayıb. AzTU SABAH mərkəzinin rəhbəri Aytən Sadıqova tələbələrə yaradılan imkanlardan bəhrələnməyi tövsiyə edib və əldə edəcəkləri biliklərin onların gələcək karyeralarında mühüm rol oynayacağını deyib. Elm və Təhsil Nazirliyi SABAH İcra Komitəsi rəhbərinin tələbələrlə iş üzrə müavini Sevinc Əliyeva, “IT Brains Academy”nin rəhbəri Orxan Məmmədov universitlərin SABAH qruplarında təhsil alan tələbələr üçün faydalı təlimlərin keçirilməsinə hər zaman şərait yaratdığı üçün AzTU rəhbərliyinə təşəkkür ediblər. Daha sonra  “IT Woman Club”un yaradıcılarından olan  AzTU SABAH qruplarının üçüncü kurs tələbəsi Sevinc Yaqubzadə təlimin keçirilməsi ilə bağlı müvafiq qaydaları tələbələrin diqqətinə çatdırıb.    

Almaniyanın Brandenburq Texniki Universitetinin (BTU) nümayəndə heyəti Azərbaycanda səfərdədir. Səfər çərçivəsində BTU-nun professoru, AzTU-nun fəxri doktoru Sylvio Simon və universitetin elmi işçisi Yuliya Marozova AzTU-nun rektoru Vilayət Vəliyev və universitetin nümayəndələri ilə görüşüb. Görüşdə AzTU ilə BTU arasında mövcud əməkdaşlıq imkanları müzakirə olunub, həmçinin gələcəkdə görüləcək işlərlə bağlı fikir mübadiləsi aparılıb.   Rektor Vilayət Vəliyev AzTU-da yeni yaradılan Alman mühəndislik fakültəsi barədə qonaqlara məlumat verib. Bildirib ki, fakültə alman mühəndislik konsepsiyası əsasında qurulacaq. Fakültənin formalaşmasında BTU-nun təcrübəsindən də istifadə edilməsi planlaşdırılır. AzTU-da olmaqdan məmnunluğunu ifadə edən Sylvio Simon yeni yaradılan fakültənin işinə uğurlar arzulayıb. Sylvio Simon Alman mühəndislik fakültəsinin yaradılmasının AzTU ilə BTU arasında əlaqələrin inkişafına töhfə verəcəyinə ümid etdiyini bildirib.  

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov və Azərbaycan Texniki Universitetinin (AzTU) rektoru Vilayət Vəliyevin iştirakı ilə “TUSİ (2C)” inkubasiya proqramları çərçivəsində görülən işlərlə bağlı AzTU-da görüş keçirilib. Görüşdə, həmçinin AzTU-nun prorektoru Rəşad Əliyev, universitetin Rəqəmsal şurasının katibi Osman Gündüz, mentorlar, tələbələr və startap təsisçiləri iştirak edib. Görüş çərçivəsində Dövlət Agentliyi və AzTU tərəfindən innovasiya sahəsində həyata keçirilən işlər, ölkəmizdə startap ekosisteminə dəstək tədbirləri haqqında geniş məlumat verilib. Sonra mentorlarla və inkubasiya proqramına qoşulmuş tələbələrlə açıq müzakirələr və fikir mübadiləsi aparılıb, həmçinin layihənin gedişatı barədə tələbələrin və müəllimlərin fikirləri dinlənilib. “Gələcək üçün bacarıqlar” layihəsinin ikinci komponenti olan " TUSİ(2C)" inkubasiya proqramı hazırda ölkəmizin 4 universitetində, mentorluq proqramı isə 12 universitetində həyata keçirilir. Qeyd edək ki, AzTU-nun müəllimləri 2021-ci ilin aprel ayından mentorluq proqramına, tələbələri isə 2022-ci ilin aprel ayından "TUSİ(2C)" inkubasiya proqramına qoşulub. Xatırladaq ki, İnnovasiyalar Mərkəzi tərəfindən həyata keçirilən “Gələcək üçün bacarıqlar” layihəsinin məqsədi innovasiya sahəsində kadr potensialının artırılması, təhsildə innovasiya fəaliyyətinin dəstəklənməsi, təhsil prosesində tələbələrə innovativ ideyalarını inkişaf etdirmək üçün dəstək göstərilməsi və onların ölkəmizin texnoloji inkişafında önəmli rol oynayan ixtira sahəsinə yönləndirilməsidir.  

Azərbaycan Texniki Universitetində (AzTU) kitab satış-sərgisi keçirilir. AzTU və "Qanun" nəşriyyatının təşkilatçılığı ilə keçirilən sərgidə Azərbaycan və dünya ədəbiyyatından müxtəlif əsərlər nümayiş olunur. Sərgi dekabrın 7-nə kimi davam edəcək.  

Azərbaycan Gənclər və İdman Nazirliyi və Azərbaycan Milli İdman Növləri Assosiasiyasının dəstəyi ilə keçirilən alpaqut turan döyüş sənəti üzrə VII Azərbaycan çempionatı başa çatıb. Çempionatda Azərbaycan Texniki Universitetinin (AzTU) Nəqliyyat və logistika fakültəsinin dördüncü kurs tələbəsi Tərlan Ağayev 70-75 kq çəki dərəcəsində mübarizə aparıb. Tərlan Ağayev alpaqut idman növünün qurşaq sistemi üzrə bütün rəqiblərinə qalib gələrək Azərbaycan çempionu adını qazanıb.