Noyabrın 4-də Bakıda Heydər Əliyev Mərkəzində Azərbaycan-Türkiyə biznes forumu keçirilib. Azərbaycan Respublikasının Baş naziri Əli Əsədov və Türkiyə Respublikasının Vitse-prezidenti Fuat Oktay biznes forumun açılışında iştirak ediblər. Ə.Əsədov və F.Oktay biznes forumun açılışında çıxış ediblər. Tədbirdə Azərbaycanda və Türkiyədə mövcud olan biznes və investisiya mühiti barədə məlumat verilib, iki ölkə arasında ticari-iqtisadi, nəqliyyat, enerji, sərmayə qoyuluşu, kənd təsərrüfatı, sənaye və digər sahələrdə əməkdaşlığın genişləndirilməsi imkanları nəzərdən keçirilib. Biznes forum çərçivəsində Azərbaycan Texniki Universiteti (AzTU) ilə İstanbul Gedik Universiteti arasında əməkdaşlıq haqqında memorandum imzalanıb. Sənədi rektorlar Vilayət Vəliyev və Ahmet Kesik imzalayıblar.

Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti (XRİTDX) ilə Azərbaycan Texniki Universiteti (AzTU) arasında əməkdaşlıq haqqında memorandum imzalanıb. Memorandumun imzalanması mərasimində XRİTDX-nin rəisi, general-leytenant İlqar Musayev, AzTU-nun rektoru professor Vilayət Vəliyev və hər iki tərəfdən nümayəndələr iştirak ediblər. Rektor AzTU-da görülən işlər, xüsusilə də kibertəhlükəsizliklə bağlı həyata keçirilən yeniliklər barədə məlumat verib. Bildirib ki, dövlətin informasiya təhlükəsizliyinə töhfə vermək məqsədilə AzTU-da Kibertəhlükəsizlik İnstitutu və Kibertəhlükəsizlik kafedrası açılıb. Bu ixtisasda təhsil alan tələbələrin yüksəkixtisaslı kadr kimi yetişmələri üçün AzTU XRİTDX ilə əməkdaşlıq etməkdə maraqlıdır. XRİTDX-nin rəisi general-leytenant İlqar Musayev çıxışında qloballaşan dünyada informasiya təhlükəsizliyinin təmin olunmasının istər milli, istərsə də beynəlxalq səviyyədə prioritet məsələyə çevrildiyini qeyd edib. Bununla yanaşı, XRİTDX tərəfindən dövlət qurumlarını təhlükəsiz internet şəbəkəsi ilə təmin etməklə yanaşı, data mərkəzində 600-dən çox dövlət informasiya ehtiyatı və 30 min dövlət qurumu istifadəçisinə xidmət göstərən elektron poçt xidməti saxlanılmaqla təhlükəsizliyinin təmin olunduğu qeyd edilib. Görülmüş tədbirlər nəticəsində ötən rüb ərzində 159 dövlət informasiya ehtiyatında təhlükəsizlik boşluqlarının aşkarlandığı və qarşısının alınması üçün müvafiq tədbirlərin görüldüyü, dövlət qurumlarının əməkdaşlarını hədəfləyən 732 min zərərverici tərkibli elektron poçt göndərişinin dövlət orqanlarına çatdırılmasının qarşısını alındığı, dövlət qurumlarının informasiya təhlükəsizliyinin təmini məqsədilə AzstateNet dövlət şəbəkəsində üçüncü rüb ərzində 81 milyon zərərli keçid, 873 min zərərverici virus, 83 min virus tərkibli faylın bloklandığı diqqətə çatdırılıb. İlqar Musayev çıxışında bu sahənin inkişafı üzrə Prezident İlham Əliyevin tapşırığına uyğun olaraq, “İnformasiya Təhlükəsizliyi və Kibertəhlükəsizlik üzrə 2023–2026-ci illər üçün Azərbaycan Respublikasının Milli Strategiyası” layihəsinin hazırlandığını və cari ilin sonuna kimi təsdiqinin gözlənildiyini vurğulayıb. Xidmət rəisi Strategiyanın Prioritet istiqamətlərdən biri kimi, elmi tədqiqatlar, təhsil və yüksəkixtisaslı kadr təminatının nəzərdə tutulduğunu və bunlarla əlaqədar təhsil müəssisələri, o cümlədən AzTU ilə əməkdaşlığın faydalarından danışıb. Sonra əməkdaşlıq haqqında memorandum imzalanıb.

Azərbaycan Texniki Universitetinin (AzTU) Kibertəhlükəsizlik kafedrasının növbəti elmi seminarı keçirilib. Seminarda kafedranın əməkdaşı Eldagiz Zamanlı “Simurq alqoritmi” haqqında məruzə ilə çıxış edib. O, alqoritmin çoxtərəfli kriptoqrafik hesablamalar əsasında onlayn lotereya tipli müsabiqələrin keçirilməsi üçün nəzərdə tutulduğunu, ölkəmizdə praktiki tətbiq sahələrinə istinad etməklə məsələnin aktuallığını qeyd edib və alqoritmin addımlarını diqqətə çatdırıb. Məruzəçi ənənəvi üsullarla onlayn keçirilən lotereya proseslərində iştirakçı səviyyəsində şəffaflığın və hesabatlılığın mümkünsüzlüyünü vurğulayıb, təklif edilən alqoritmlə bu problemin həlli yolunu göstərib. Simurq alqoritmi vasitəsilə lotereya mükafatçılarının seçimi prosesində bütün lotereya iştirakçılarının rol oynadığını və onların nəticələrə birbaşa təsir etdiyini qeyd edib. Bildirib ki, hər bir iştirakçı nəticələr elan edildikdən sonra nəticələrə etdiyi təsiri müşahidə edə və nəticələrin  təsadüfiliyinə əmin ola biləcək. Bununa da lotereya təşkilatçısı və iştirakçıları arasındakı etimadsızlıq problemi həll olunur.  Seminarın sonunda Eldagiz Zamanlı sualları cavablandırıb. Məruzəçiyə bu istiqamətdə tədqiqatın genişləndirilməsi, alqoritmi reallaşdırmaq üçün müvafiq proqram təminatı platformasının təkmilləşdirilməsi tövsiyə edilib.     

8 Noyabr – Zəfər Günü ilə əlaqədar Azərbaycan Texniki Universitetinin (AzTU) Azad Həmkarlar İttifaqı Komitəsinin büro üzvləri II Fəxri xiyabanı ziyarət ediblər. Torpaqlarımızın ərazi bütövlüyü uğrunda canlarından keçən şəhidlərin əziz xatirəsi ehtiramla yad edilib, məzarları üzərinə gül dəstələri düzülüb.   

  “44 Günlük Dastan” layihəsi çərçivəsində tələbələrlə növbəti görüş Azərbaycan Texniki Universitetində (AzTU) keçirilib. Qəhrəman qazi və döyüşçülərimizin tələbələr arasında tanıdılması məqsədilə keçirilən görüşdə əvvəlcə torpaqlarımızın ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad olunub. Tədbirdə AzTU-nun Tələbə Gənclər Təşkilatının (TGT) sədri Eyvəz Məhəmmədli, Böyük Qayıdış Gənclər Təşkilatının İdarə Heyətinin üzvü, Aprel döyüşləri qazisi Əhliyət Mehdiyev çıxış ediblər.Daha sonra tədbirin qonağı olan Vətən müharibəsi qaziləri Fətulla Nəsirov, Həsən Yaqubov, Cümşüd Zeynalov və Elnur Abbasov keçdikləri döyüş yolu ilə bağlı xatirələrini gənclərlə bölüşüblər. Panel görüşdən sonra qazilər tələbələrin suallarını cavablandırıblar.

Azərbaycan Texniki Universitetinin (AzTU) SABAH qruplarının nəzdində yaradılmış “IT Woman Club”la “IT Brains Academy”nin birgə əməkdaşlığı çərçivəsində tələbə qızlar üçün  “İT sahəsində ilk addımlar” adlı seminar keçirilib. Seminarda AzTU ilə yanaşı, Bakı Dövlət Universiteti, Azərbaycan Dövlət İqtisad Universiteti, Azərbaycan Memarlıq və İnşaat Universiteti, Azərbaycan Dövlət Neft və Sənaye Universiteti və Azərbaycan Dövlət Pedaqoji Universitetinin tələbələri də iştirak edib. Tədbirdə çıxış edən AzTU SABAH Mərkəzinin rəhbəri Aytən Sadıqova bu təşəbbüsün tələbə qızlar üçün faydasından danışıb.   Daha sonra “IT Brains Academy”nin rəhbəri Orxan Məmmədov çıxış edib. Bildirib ki, İT sahəsinə marağı olan, bu istiqamətdə bacarıqlarını daha da inkişaf etdirmək istəyən tələbə qızlar üçün “IT Club” təşkil olunacaq. Seminar sual-cavab formatında davam etdirilib.

Azərbaycan Texniki Universitetinin (AzTU) Elmi şurasının növbəti iclası keçirilib. İclasda yay imtahan sessiyasının nəticələri, 2022/2023-cü tədris ili üzrə tələbə qəbulunun yekun hesabatı dinlənilib. AzTU-nun Türk Aviasiya və Kosmik Sənaye Şirkəti (TUSAŞ) ilə əməkdaşlığı çərçivəsində icrasına başlanılan “AzTU-Turkish Aerospace, MGP 2023” proqramı haqqında da şura üzvlərinə məlumat verilib. Qeyd olunub ki, bakalavriat (IV kurs ), magistratura (I və II kurs ) və doktorantura səviyyələrində təhsil alan və akademik göstəriciləri yüksək olan tələbələr arasından seçiləcək 48 nəfər dinləyici statusu qazanaraq 4 ay müddətində sözügedən proqramda iştirak edəcək. İclasda, həmçinin ingilis dilinin tədrisinin daha da təkmilləşdirilməsi və digər məsələlər müzakirə olunub.

Oktyabrın 28-də Təhsilin İnkişafı Fondu, Təhsildə Keyfiyyət Təminatı Agentliyi və Azərbaycan Texniki Universiteti (AzTU) arasında “Universitetlərin elmi-pedaqoji heyət üzvləri və təhsilalanların IELTS imtahanına təşviq edilməsi haqqında” əməkdaşlıq müqaviləsi imzalanıb. Tədbirdə çıxış edən elm və təhsil nazirinin müavini Muxtar Məmmədov ali təhsil müəssisələrində ingilis dilinin təkmilləşdirilməsinin əhəmiyyətinə toxunub. Nazir müavini qeyd edib ki, bu, keyfiyyətli elmi məqalələrin yazılması, dövlətlərarası önəmli akademik layihələrdə fəal iştirakın təmin edilməsi, elmi-pedaqoji heyətin qabaqcıl ölkələrin təcrübəsindən yararlanması və nəticədə, “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın “Rəqabətli insan kapitalı və müasir innovasiyalar məkanı” komponenti üzrə nəzərəçarpacaq irəliləyişlərin əldə olunmasına xidmət edəcək. Daha sonra çıxış edən Təhsilin İnkişafı Fondunun İdarə Heyətinin sədri Elnur Nəsibov fondun ümumi fəaliyyəti, strateji hədəfləri, həmçinin tamamlanma mərhələsində olan digər təşəbbüsləri barədə tədbir iştirakçılarını məlumatlandırıb. Elnur Nəsibov bu layihənin fondun ali təhsil müəssisələri ilə tərəfdaşlıq, elmi jurnal, nəşr və dərsliklərin hazırlanmasında universitetlərə dəstək və akademik mobillik proqramlarının həyata keçirilməsi üçün əhəmiyyətli komponent olduğunu bildirib.  Təhsildə Keyfiyyət Təminatı Agentliyinin İdarə Heyətinin sədri Ülkər Səttarova çıxışında hazırkı dövrdə elm və təhsilin inkişafında xarici dil biliklərinin, xüsusilə, ingilis dilinin önəmli olduğunu qeyd edib. Ülkər Səttarova əlavə edib ki, layihənin başlıca məqsədi məhz ali təhsil ocaqlarının müəllim və tələbələrinin bu dili mənimsəməsi üçün əlverişli şəraitin yaradılmasıdır.  Britaniya Şurasının Azərbaycan üzrə direktoru Nərgiz Hacıyeva çıxış edərək Şuranın Azərbaycandakı 30 illik fəaliyyəti ərzində həyata keçirdiyi proqramlar və əldə etdiyi uğurlar barədə qonaqları məlumatlandırıb.   Sonra layihənin benefisiar qurumlarından olan AzTU-nun rektoru Vilayət Vəliyev çıxış edib. Rektor əməkdaşlıq müqaviləsinin universitetlər üçün əhəmiyyətindən danışıb.   Qeyd edək ki, sözügedən layihə çərçivəsində IELTS imtahanında iştirak edən və yüksək bal toplayan 300-dək akademik heyət üzvü və tələbənin bu imtahan üzrə ödənişlərinin Təhsilin İnkişafı Fondu tərəfindən qarşılanması planlaşdırılır.  

Azərbaycan Texniki Universitetinin (AzTU) Türk Aviasiya və Kosmik Sənaye Şirkəti (TUSAŞ) ilə əməkdaşlığı çərçivəsində “AzTU-Turkish Aerospace, MGP 2023” proqramına dinləyici qəbulu elan edilir. Proqramda AzTU-nun qeydiyyat formasında göstərilən mühəndislik ixtisasları üzrə 4-cü kurs bakalavriat, 1-ci və 2-ci kurs magistratura və doktorantura səviyyələrində təhsil alan akademik göstəriciləri yüksək olan tələbələr iştirak edə bilərlər.  Namizədlər, həmçinin 31 oktyabr 2022-ci il tarixində proqram hazırlıqları çərçivəsində “AzTU-TUSAŞ əməkdaşlıq: Mühendis Geliştirme Proqramı 2023” mövzusunda tanıtım təqdimatına və "Açıq qapı"ya dəvət olunurlar.    Dinləyicilərin yekun seçim imtahanı 4 noyabr 2022-ci il tarixində təşkil olunacaq. Yekun imtahanın nəticələrinə əsasən, dinləyici statusu qazanan bakalavr və magistr tələbələrin təcrübə kreditləri proqramda iştirakla əvəzlənəcək. Həmçinin diplom işlərinin proqramın məzmunu ilə uyğunlaşdırılması üçün müvafiq tövsiyələr veriləcək.  Proqram 13.02.2023 -16.06.2023-cü il tarixlərində 4 ay müddətində davam edəcək.  Proqramda iştirakçıların say həddi 48 nəfərdir. Proqramı müvəffəqiyyətlə başa vuran tələbələrə sertifikat təqdim olunacaq.   Proqramda iştirak AzTU tələbələri üçün ödənişsizdir.  Qeydiyyat üçün keçid  

Azərbaycan Texniki Universitetində (AzTU) Azərbaycan Qan Donorluğunun İnkişafı Mərkəzinin təşkilatçılığı, Talassemiya Mərkəzi və Mərkəzi Qan Bankının birgə dəstəyi ilə “Sağlam olaq – Donor olaq” adlı maarifləndirmə tədbiri keçirilib. Tədbirdə AzTU-nun Humanitar fənlər kafedrasının müdiri Həbib Mirzəyev, Azərbaycan Qan Donorluğunun İnkişafı Mərkəzinin İdarə Heyətinin sədri Fuad Rəsul, Dünya Narkotiklə Mübarizə Aparan İdmançılar Federasiyasının Azərbaycan nümayəndəliyinin rəhbəri Cavid Allahverdiyev, həmçinin Talassemiya Mərkəzinin həkim-hematoloqu Sevinc Nəbiyeva, Mərkəzi Qan Bankının həkimi Fəridə Məmmədova mövzu ətrafında çıxış ediblər. Qeyd olunub ki, Azərbaycan Qan Donorluğunun İnkişafı Mərkəzinin əsas məqsədi müvafiq dövlət orqanları və özəl sektorlarla qan donorluğu sahəsində yaxından əməkdaşlıq etmək, həmçinin ölkəmizdə qan donorluğu ilə bağlı gənclər arasında təbliğatın gücləndirilməsinə xidmət etməkdir. Tədbirin sonunda suallar cavablandırılıb.