Fevralın 8-də Azərbaycan Texniki Universitetinin (AzTU) rəhbərliyi qardaş ölkəyə dəstək məqsədilə Türkiyənin ölkəmizdəki səfirliyinin qarşısına gəliblər. Türkiyədə baş vermiş zəlzələ nəticəsində həlak olanların xatirəsi anılıb, səfirliyin qarşısındakı guşəyə gül dəstələri düzülüb. Xatırladaq ki, Türkiyədə güclü zəlzələ ilə əlaqədar 7 günlük matəm elan edilib.  

                                                                                                        Erasmus+ proqramının “Azərbaycanda Rektorlar Konfransının yaradılması” (ECAR) layihəsi çərçivəsində növbəti təlimləri Polşada keçirilib. Polşa Universitetlərinin Rektorlar Konfransının (CRASP) təşkil etdiyi təlimlərdə Azərbaycanın layihə konsorsiumunun üzvü olan 20 ali təhsil müəssisəsinin prorektorları və digər səlahiyyətli nümayəndələri iştirak edib. Təlimdə Azərbaycan Texniki Universitetini (AzTU) tədris işləri üzrə prorektor Nurəli Yusifbəyli təmsil edib. Polşa ali təhsil müəssisələrinin strateji inkişaf məsələlərinin öyrənilməsi məqsədilə təşkil olunan təlimlərin ilk iki günü  Kozminski Universitetində keçirilib. Burada universitetin ümumi inkişaf dayanıqlı inkişaf, rəqəmsal tranformasiya strategiyaları, həmçinin əməkdaşların təkmilləşdirilməsi ilə bağlı yerli və Avropa layihələri üzrə təcrübələri öyrənilib. Səfərin növbəti günlərində Varşava Həyat Elmləri Universitetinin rektoru və Polşa Universitetlərinin Rektorlar Konfransının vitse-prezidenti Michał Zasada strateji planlamada insan resurslarının idarəedilməsi, maliyyənin idarəedilməsinin əsas kriteriyaları, o cümlədən CRASP-ın fəaliyyəti ilə bağlı tədbir iştirakçılarına ətraflı məlumat verib. Həmçinin CRASP-ın baş katibi Agata Kulesza səfər iştirakçıları ilə CRASP-ın milli və beynəlxalq təcrübələri ilə bağlı ətraflı fikir mübadiləsi aparıb. Varşava Həyat Elmləri Universitetinin əməkdaşları tərəfindən strateji inkişaf və keyfiyyət məsələlərinin qarşılıqlı əlaqəsi, Polşa ali təhsil müəssisələrində monitorinq və qiymətləndirmə prosesləri, strateji idarəetmə üzrə akkreditasiya meyarları kimi mühüm mövzularda təlim-seminarlar keçirilib. Təlim proqramı çərçivəsində Varşava Universitetinin əməkdaşı Şəhla Kazımova tərəfindən universitetdə Azərbaycan dilinin tədrisi, Azərbaycan mədəniyyətinin təbliği, elmi konfranslar və digər tədbirlər haqqında geniş təqdimat olub. Səfər çərçivəsində Azərbaycan ali təhsil müəssisələrinin nümayəndələri Azərbaycanın Polşadakı səfiri Nərgiz Qurbanova ilə görüşüb.  Görüş zamanı xanım səfir Polşada, xüsusilə ali məktəblərdə həyata keçirilən sosial-mədəni tədbirlər, layihələr haqqında məlumat verib. Nərgiz Qurbanova universitetlərimizi Polşa ali təhsil müəssisələri ilə əməkdaşlığı daha da gücləndirməyə dəvət edib və bu istiqamətdə müvafiq dəstəyin göstərilə biləcəyini bildirib. Təlim proqramının yekununda Bakı Biznes Universitetinin mərkəz direktoru, layihənin koordinatoru Gülşən Bayramova və ECAR layihəsi çərçivəsində pilot olaraq yaradılan Strateji inkişaf üzrə komitənin İdarə Heyətinin sədri Araz Aslanlı ilə həyata keçirilən fəaliyyətlər və qarşıda duran mühüm tapşırıqlar, həmçinin komitənin gələcək fəaliyyət planı istiqamətində müzakirələr aparılıb.

Azərbaycan Texniki Universitetinin (AzTU) rektoru Vilayət Vəliyev Tələbə Gənclər Təşkilatının (TGT) İdarə Heyətinin üzvləri ilə görüşüb. Rektor AzTU TGT-nin “İlin Tələbə Gənclər Təşkilatı” seçilməsi münasibətilə təşkilat üzvlərini təbrik edib. Bildirib ki, bu uğur təşkilatın hər bir üzvünün əməyinə verilən qiymətdir. Bu həm də təşkilat üzvlərinin komanda şəklində işləmə bacarığının olmasına bariz nümunədir. Daha sonra rektor TGT-nin İdarə Heyətinin hər bir üzvü ilə yaxından tanış olub, onların dərsləri ilə maraqlanıb, həmçinin təkliflərini dinləyib. TGT sədri Eyvaz Məhəmmədli son bir il ərzində təşkilatın gördüyü işlər, hədəflər və gözləntilər haqqında rektora məlumat verib. Görüşdə təşkilatın həyata keçirəcəyi yeni layihələr barədə də fikir mübadiləsi aparılıb.

Azərbaycan Texniki Universitetinin (AzTU) rektoru Vilayət Vəliyev Gənclər üçün Prezident mükafatına layiq görülən AzTU “SABAH” qruplarının məzunu Şahin Xəlilovla görüşüb. Görüşdə Prezident İlham Əliyevin gənclərə göstərdiyi diqqət və qayğı xüsusi vurğulanıb. Rektor Vilayət Vəliyev Şahin Xəlilovun fəaliyyəti ilə maraqlanıb, Gənclər üçün Prezident mükafatına layiq görülməsi münasibətilə onu təbrik edib. Qeyd edək ki, Şahin Xəlilov 2017-ci ildə AzTU “SABAH” qruplarını kompüter mühəndisliyi ixtisası üzrə fərqlənmə ilə bitirib. Daha sonra kompüter mühəndisliyi ixtisası üzrə Çində magistr təhsili alıb. Təhsil aldığı müddətdə “Azercell” Təqaüd Proqramının və “Seeds for the Future” proqramının qalibi olub. Onun yaratdığı "Wake me up" komandası "Ağıllı eynək" startapı ilə bir çox uğurlar qazanıb. 

Azərbaycan Texniki Universitetində (AzTU) metallurgiya, materiallar texnologiyası, fizika, kimya, maşın mühəndisliyi, mexanika və digər istiqamətlərdə praktiki biliklərin verilməsi və tədqiqatların aparılması məqsədilə Türkiyə Əməkdaşlıq və Koordinasiya Agentliyi (TİKA) tərəfindən müvfiq kafedraların gənc professor-müəllim heyətinə təlim keçirilib. İkigünlük təlim TİKA-nın dəstəyi ilə alınan ezAFM+ atom mikroskopunun iş prinsipinə həsr olunub. Təlimçi İrmak Gürlek Sönmez tərəfindən aparılan təlimin birinci günü "ezAFM+ atom mikroskopu: giriş təlimi"ndə avadanlığın iş prinsipi və mikroskopun komponentləri barədə məlumat verilib. Təlimin ikinci günü “ezAFM+ atom mikroskopu: istifadəçi təlimi”ndə isə mikroskop üzərində praktiki işlər, cihazın quraşdırılması və istifadəsi barədə qaydalar əməkdaşların diqqətinə çatdırılıb. Təlimin sonunda iştirakçıların sualları cavablandırılıb. 

Azərbaycan Respublikasının Gənclər Fondunun dəstəyi, Azərbaycan Tələbə Gənclər Təşkilatları İttifaqının təşkilatçılığı ilə Tələbə Gənclər Təşkilatlarının 2 fevral – Azərbaycan Gəncləri Gününə həsr olunan "ReBrend" Forumu keçirilib. Forumun keçirilməsində əsas məqsəd TGT-lərin uzunmüddətli PR strategiyasının müəyyən olunması, inkişaf üçün düzgün planlanma aparılmasına dəstək göstərilməsindən ibarət olub.  Əvvəlcə Azərbaycanın Dövlət Himni səsləndirilib, şəhidlərin əziz xatirəsi bir dəqiqəlik sükutla yad olunub.  Daha sonra “Tələbə Gənclər Təşkilatlarının qarşısındakı hədəflər və gözləntilər” mövzusunda tələbələrlə panel görüş keçirilib.  Rəsmi hissə müxtəlif nominasiyalar üzrə TGT-lərin, TGT sədrlərinin və aktiv üzvlərin mükafatlanması ilə yekunlaşıb.  İl ərzində ölkənin ictimai-sosial həyatına verdiyi töhfəyə və aktiv fəaliyyətinə görə Azərbaycan Texniki Universitetinin (AzTU) Tələbə Gənclər Təşkilatı (TGT)  “İlin Tələbə Gənclər Təşkilatı” adına layiq görülüb.  “İlin Tələbə Gənclər Təşkilatı” adına layiq görülən AzTU TGT-nin sədri Eyvaz Məhəmmədli öz fikirlərini bölüşüb:  “Hesab edirəm ki, TGT-lərin düzgün kommunikasiya qurması istiqamətində bu kimi tədbirlərin keçirilməsi biz gənclərin inkişafı üçün çox faydalı və əhəmiyyətlidir. Bizim üçün xüsusi önəmli bir məqamı da qeyd etmək istərdim. “ReBrend” Forumunda Azərbaycan Texniki Universitetinin Tələbə Gənclər Təşkilatı olaraq “İlin TGT-si” adına layiq görüldük. Bu bizi çox sevindirdi, eyni zamanda məsuliyyətimizi daha da artırdı. Qarşıda bizi gözləyən hədəflərimiz var. Gənclərlə birgə hədəflərimizə çatacağımıza inanırıq. Bir daha diqqət üçün ATGTİ-yə təşəkkür edirik.”

Azərbaycan Texniki Universiteti (AzTU) Həmkarlar İttifaqı Komitəsinin (HİK) təşkilatçılığı ilə 2 fevral – Azərbaycan Gəncləri Gününə həsr olunan “AzTU Gəncləri 2023” müsabiqəsinin mükafatlandırılması mərasimi keçirilib. Tədbirdə AzTU HİK-in sədri Elvin Bəxtiyarlı, sosial məsələlər və ictimaiyyətlə əlaqələr üzrə prorektor Nərmin Rzayeva gəncləri təbrik edib. Gənclərin ölkənin bütün sahələrdə inkişafında önəmli rolu xüsusi vurğulanıb. Qeyd olunub ki, AzTU-da da gənc müəllim və əməkdaşların gələcək inkişafı istiqamətində müxtəlif tədbirlər həyata keçirilir. Daha sonra universitetin ictimai həyatında fəallıq göstərən AzTU-nun gənc əməkdaş və müəllimləri fəxri fərman və müxtəlif hədiyyələrlə mükafatlandırılıb. Tədbirin sonunda “AzTU Gəncləri 2023” müsabiqəsinin qaliblərinin adı açıqlanıb. Müsabiqənin nəticəsinə əsasən, 3-cü yer üzrə Nuran Süleymanova “AzTU-da ilin gələcək vəd edən gənci”, 2-ci yer üzrə İsmayıl İsmayıl “AzTU-da ilin peşəkar gənci”, 1-ci yer üzrə Qoşqar Rəsulov "AzTU-da ilin gənci" nominasiyası üzrə qalib elan olunub. Qaliblərə AzTU HİK tərəfindən pul mükafatı və fəxri fərman təqdim olunub.  

Azərbaycan Basketbol Federasiyasının təşkilatçılığı ilə Azərbaycan Texniki Universitetinin (AzTU) İdman sarayında keçirilən Basketbol üzrə Tələbə Liqasının oyunları davam edir. Liqanın 8-ci turunda AzTU komandası Bakı Mühəndislik Universitetinin (BMU) komandası ilə qarşılaşıb. Maraqlı mübarizə şəraitində davam edən oyun 95:53 hesabı ilə AzTU komandasının xeyrinə yekunlaşıb.  Qeyd edək ki, liqanın oyunlarında AzTU, ADBTİA, ADAU, ADNSU, UNEC, BMU və Xəzər Universitetinin komandaları iştirak edir. Oyunları “AzTU TV” yutub kanalından canlı izləyə bilərsiniz.  

Alman Akademik Mübadilə Xidmətinin (DAAD) Tbilisi Regional Ofisinin rəhbəri Gebhard Reul Azərbaycan Texniki Universitetinin (AzTU) qonağı olub. Rektor Vilayət Vəliyevlə görüşən Gebhard Reul DAAD ilə AzTU-nun mövcud əməkdaşlığından və bu əlaqələrin genişləndirilməsindən danışıb.    AzTU-da yeni yaradılan Alman mühəndislik fakültəsi barədə qonağa məlumat verən rektor bu fakültənin fəaliyyəti çərçivəsində mövcud əməkdaşlığın genişləndirilməsinin zəruriliyini bildirib. Tələbə və müəllimlərin alman dili biliklərinin artırılması üçün 2022-ci ilin payız semestrindən AzTU-da fəaliyyət göstərən DAAD-nin alman dili müəlliminin bu baxımdan əhəmiyyətini vurğulayan Vilayət Vəliyev elektroenergetika, bərpa olunan enerji texnologiyaları, metallurgiya, kibertəhlükəsizlik, süni intellekt və informasiya texnologiyaları sahəsində əməkdaşlığın vacibliyini vurğulayıb. Həmçinin bu istiqamətdə DAAD-nin mövcud proqramlarına müraciət ediləcəyini bildirib. Vilayət Vəliyev Brandenburq Texniki Universiteti Cottbus-Senftenberg (BTU Cottbus-Senftenberg) ilə magistatura və doktorantura səviyyələrində imzalanan ikili diplom müqavilələrindən də bəhs edib və bu əməkdaşlığın həyata keçirilməsində DAAD-nin dəstəyini xüsusi vurğularaq təşəkkürünü bildirib.     Daha sonra Gebhard Reul DAAD-nin magistratura proqramına müraciət edən namizədlərin müsahibə mərhələsinin mart ayında AzTU-da keçirilməsi üçün yaradılacaq şəraitlə tanış olub və dəstək üçün təşəkkürünü bildirib.        

Azərbaycan Texniki Universitetinin (AzTU) "InTech" komandasının üzvləri Nəqliyyat və logistika fakültəsinin IV kurs tələbəsi Mirsahib Ağazadə, İnformasiya və telekommunikasiya texnologiyaları fakültəsinin III kurs tələbəsi Ömər Ələsgərov və Energetika və avtomatika fakültəsinin I kurs tələbəsi Sübhan Ələsgər ilk dəfə Azərbaycan dilində proqramlaşdırılan 3D printer hazırlayıblar. AzTU-nun “Cezeri Lab” laboratoriyasında hazırlanan 3D printer keyfiyyəti, sürəti və səssizliyi ilə digərlərindən fərqlənir. Bu cihaz kompüterdəki 3D modeli lay-lay çap edərək emal olunmasına imkan verir. 3D printerdə müxtəlif materiallardan istifadə etmək mümkündür. Ən çox istifadə olunan isə PLA (plastik) materialdır. Texnologiyanın ən böyük üstünlüyü dizaynların tez və asanlıqla çap olunub fiziki hala gətirilməsidir. Bu həm də dizayn və istehsal prosesini sürətləndirir. Tələbələrin hazırladıqları sözügedən layihə təhsil müəssisələri və şəxsi istifadə üçün nəzərdə tutulub. Qeyd edək ki, “Cezeri Lab” laboratoriyası Türk Əməkdaşlıq və Koordinasiya Agentliyi (TİKA) tərəfindən qurulub.