Selçuk Bayraktara Azərbaycan Texniki Universitetinin fəxri doktroru adı verilib Mayın 25-də “Baykar” şirkətinin texnoloji lideri, “Teknoloji Takımı Vakfı”nın (T3 Vakfı) Qəyyumlar Şurasının sədri, “Qarabağ”ordenli Selçuk Bayraktara Azərbaycan Texniki Universitetinin (AzTU) fəxri doktoru adının verilməsi mərasimi keçirilib. Tədbirdə Türkiyənin Azərbaycandakı səfiri Cahid Bağçı, hər iki ölkənin müxtəlif nazirliklərinin rəhbər şəxsləri, universitetin professor-müəllim heyəti və tələbələri iştirak edib. Tədbirdə çıxış edən təhsil nazirinin müavini Firudin Qurbanov Selçuk Bayraktarı AzTU-da görməkdən məmnunluğunu ifadə edib. Bildirib ki, şəxsin inkişafı onun mükəmməl elmə və təhsilə yiyələnməsi ilə birbaşa bağlıdır. Bu mənada  Bayraktarı bütün dünyaya tanıdan onun mükəmməl elmə, təhsilə yiyələnməsi olub. Azərbaycanda müdafiə sənayesinin inkişafına göstərilən diqqətdən danışan nazir müavini qeyd edib ki, bu istiqamətdə yüksəkixtisaslı kadr hazırlığının aparılması da mühüm şərtlərdəndir. O qeyd edib ki, hazırda AzTU regionda müdafiə sənayesi üzrə kadr hazırlayan yeganə universitetdir. Firudin Qurbanov son illər AzTU-nun Türkiyənin aparıcı universitetləri, tədqiqat və innovasiya mərkəzləri ilə əməkdaşlıq əlaqələrini yüksək səviyyədə inkişaf etdirdiyini də diqqətə çatdırıb. Sonra AzTU-nun fəxri qonağı Selçuk Bayraktar tələbələrlə görüşüb. Müdafiə sənayesinin inkişafının ölkə üçün əhmiyyətini vurğulayan Bayraktar müəllifi olduğu müasir texnologiyalar, eyni zamanda hazırda Türkiyənin ilk uçan avtomobili olan “CEZERİ”, Türkiyənin ilk pilotsuz döyüş təyyarəsi olacaq Bayraktar Kızılelma (MİUS) layihələri və üzərində çalışdığı yeni tədqiqat işləri barədə tələbələrə məlumat verib. Daha sonra Selçuk Bayraktara Azərbaycan Texniki Universitetin fəxri doktoru adının verilməsi mərasimi keçirilib. Fəxri doktor diplomunu qonağa AzTU-nun rektoru, professor Vilayət Vəliyev təqdim edib. Rektor qeyd edib ki, Selçuk Bayraktar AzTU-nun fəxri doktorları arasında ən gəncidir. Vilayət Vəliyev Selçuk Bayraktarın rəqəmsal platformada texnoloji gələcək üçün apardığı araşdırmalar, elm və texnologiyanın inkişafına verdiyi əvəzsiz töhfələri xüsusi qeyd edib və AzTU-nun tələbələri ilə görüşdüyü üçün ona təşəkkür edib. Qeyd edək ki, bu günə qədər 15 nəfərə AzTU-nun fəxri doktoru adı verilib, onlardan biri də Selçuk Bayraktardır. Selçuk Bayraktara AzTU-nun fəxri doktoru adı onun rəqəmsal platformada texnoloji gələcək üçün apardığı araşdırmalar, verdiyi ideyalar və ağıllı həllər nəticəsində elm və texnologiyanın inkişafına əvəzsiz töhfələrinə, Türkiyə ilə Azərbaycan arasında müdafiə sənayesi sahəsində əməkdaşlığın ən yüksək səviyyəyə çatdırılmasındakı dəstəyinə, Azərbaycanda gənc mühəndis kadrların hazırlanmasına və texnoloji innovasiyaların öyrənilməsinin kütləviləşməsinə verdiyi müstəsna xidmətlərinə görə təqdim edilib. Tədbirdən sonra Selçuk Bayraktar universitetin foyesində “TEKNOFEST Azərbaycanda” iştirak edəcək AzTU komandalarının əl işlərindən ibarət sərgiyə və rəsm sərgisinə baxıb. Sonda xatirə şəkli çəkdirilib.

Azərbaycan Texniki Universiteti (AzTU) ilə “CONIM Cert” MMC arasında qarşılıqlı əməkdaşlıq uğurla davam etdirilir. Əməkdaşlıq çərçivəsində “CONIM Cert” MMC-nin icraçı direktoru Mehriban Osmanova AzTU-nun İqtisadiyyat və idarəetmə fakültəsinin tələbələri üçün "İSO 9001:2015 Keyfiyyəti idarəetmə sistemlərinin əsasları" mövzusunda təlim keçib. Təlimdə iştirak edən tələbələrə sertifikat təqdim olunub.

Azərbaycan Texniki Universitetinin (AzTU) tərəfdaşı olduğu Erasmus+ KA2 proqramı çərçivəsində həyata keçirilən UniClad layihəsi üzrə hazırlanılan “Yem kalkulyatoru” mobil tətbiqi “Caspian Agro 2022” sərgisində nümayiş olunur.   “Yem kalkulayatoru” mobil tətbiqi “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” layihəsi (UniClaD) çərçivəsində pilot olaraq hazırlanıb.   Qeyd edək ki, universitet-sənaye işbirliyinin qurulmasını təşfiq edən UniClad layihəsi çərçivəsində AzTU-da İnnovativ Texnologiyalar Mərkəzi yaradılıb. Gələcəkdə bu mərkəzin informasiya texnologiyaları və sənaye əhəmiyyətli həllər üçün klasterə çevrilməsi nəzərdə tutulub. Mərkəzin işi çərçivəsində pilot olaraq hazırlanan “Yem kalkulyatoru” layihəsi Kənd Təsərrüfatı Nazirliyinin Heyvandarlığın təşkili və monitorinqi şöbəsi və Aqrar İnnovasiya Mərkəzinin dəstəyi ilə hazırlanıb.   Layihənin proqram təminatını AzTU-nun Mühəndis riyaziyyatı və suni intelekt kafedrasının baş müəllimi Natiq Qurbanov hazırlayıb. Texniki dəstəyin göstərilməsini AzTU-nun doktorantı Elnur Sadıqov, mobil tətbiqə məlumatların daxil edilməsini isə  AzTU-nun İnformasiya və telekommunikasiya texnologiyaları fakültəsinin tələbələri həyata keçirib.  Milli "Erasmus +" ofisinin direktoru Pərviz Bağırov da  “Yem Kalkulyatoru” mobil tətbiqinin stendi ilə tanış olub, pilot layihənin funksionallığı ilə yaxından maraqlanıb. Qeyd edək ki, “Caspian Agro 2022”sərgisi mayın 20-də başa çatacaq.

“Pəncərə” - tələbə məsələlərinin araşdırılması, müraciətlərin dinlənilməsi, təklif və iradların aidiyyətı üzrə yönləndirilməsinə dəstək proqramı çərçivəsində ilk görüş Azərbaycan Texniki Universitetində (AzTU) keçirilib. Azərbaycan Tələbə Gənclər Təşkilatları İttifaqının (ATGTİ) təşkilatçılığı ilə keçirilən görüşdə AzTU tələbələri iştirak edib. ATGTİ-nin proqram meneceri Nigar Hüseynova tədbiri açıq elan etdikdən sonra Azərbaycanın Dövlət Himni səsləndirilib, torpaqlarımızın ərazi bütövlüyü uğrunda canlarından keçən Vətən övladlarının əziz xatirəsi bir dəqiqəlik sükutla yad edilib. Daha sonra görüş AzTU-nun sosial məsələlər və ictimaiyyətlə əlaqələr üzrə prorektoru Kamran Rəsulovun çıxışı ilə davam edib.  “Pəncərə” proqramının əhəmiyyətindən danışan Kamran Rəsulov bunun tələbələrin təklif və iradlarının operativ cavablandırılması baxımından faydalı olduğunu qeyd edib. “Pəncərə” proqramının rəhbəri Fidan Həsənova proqramın missiyası, hədəfləri və fəaliyyət istiqamətləri haqqında danışıb.  Daha sonra AzTU-nun prorektoru Kamran Rəsulov, ATGTİ-nin sədri Pərviz Mirələmli və AzTU TGT-nin sədri Eyvaz Məhəmmədlinin iştirakı ilə sual-cavab sessiyası keçirilib. Sessiya zamanı tələbələr onları maraqlandıran suallara cavab tapıb, TGT-nin fəaliyyətinin genişləndirilməsi və daha effektiv işlərin həyata keçirilməsiistiqamətində öz təkliflərini səsləndiriblər.

Təhsil Nazirliyinin “Ali və orta ixtisas təhsilinin 2021/2022-ci illər üzrə inkişafı” mövzusunda keçirdiyi qrant müsabiqəsi üzrə Azərbaycan Texniki Universitetinin (AzTU) qalib olduğu “AzTU-da prioritet mühəndislik ixtisasları üzrə professor-müəllim heyətinin akademik mobilliyinin səmərəli təşkili ilə elmi potensialın gücləndirilməsi və yüksəkixtisaslı kadr hazırlığının təmin olunması mexanizminin yaradılması” layihəsinin təlimlərinə başlanılıb. Təlimlər akademik heyətin elmi potensialının artırılması məqsədi ilə Azərbaycan Respublikasının Təhsil İnstitutu (ARTİ) tərəfindən  keçirilir.  2 qrup üzrə təşkil olunan təlimlərdə ümumilikdə 24 professor və müəllim iştirak edir. Təlimlər “Elmi məqalənin yazılma qaydası”, “Elmi işlərin yazılmasında müasir yanaşmalar”, “Tədqiqat metodları: Kəmiyyət metodları”, “Tədqiqat metodları: Keyfiyyət metodları”, “Beynəlxalq indeksli jurnallarda məqalə nəşri” mövzuları üzrə  təşkil olunub. Təlim müddətində iştirakçılara elmi-tədqiqatların işlənməsi zamanı faydalı alətlər və resursların təqdim edilməsi, nümunə və praktiki tapşırıqlar üzərindən mövzuların çatdırılması nəzərdə tutulur. Təlimlərdə uğurla iştirak edən professor-müəllim heyətinə sertifikat təqdim olunacaq.

Azərbaycan Texniki Universitetinin (AzTU) professoru Tofiq Mansurov Moskva Rabitə və İnformatika Texniki Universitetində “İnformasiya cəmiyyətinin texnologiyaları-2022” mövzusunda XVI beynəlxalq elmi-texniki konfransda çıxış edib. Onun məruzəsi diploma layiq görülüb.   Tofiq Mansurov, həmçinin Belarus Dövlət Rabitə Akademiyasında “Telekommunikasiya və poçt rabitəsində yeni informasiya texnologiyaları” mövzusunda XXII beynəlxalq elmi-texniki konfransın açılışında iştirak edib. Azərbaycan, Qazaxıstan, Livan, Rusiya, Tacikistan, Türkmənistan və Özbəkistandan olan tələbələr və onların elmi-rəhbərlərinin iştirak etdiyi konfransda AzTU-nun professoru çıxış edib və konfransın işinə uğurlar arzulayıb.  Konfransın sonunda iştirakçılara sertifikat təqdim olunub.

Ölkəmizə səfər edən Monqolustan Gimnastika Federasiyasının icraçı direktoru və baş katibi,  Monqolustan Elm və Texnologiya Universitetinin professoru Yeruulbat Galbadrakhın başçılıq etdiyi nümayəndə heyəti Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyevlə görüşüb.Görüşdə iki universitet arasında bərpa olunan enerji, nəqliyyat və logistika, sənaye, iqtisadiyyat və digər sahələrdə əməkdaşlığın perspektivləri müzakirə olunub. Monqolustanlı qonaqlar AzTU ilə əməkdaşlıqda maraqlı olduqlarını bildiriblər. Qeyd olunub ki,  universitetlər arasında əməkdaşlıq əlaqələrinin yaranması hər iki ölkənin elm və təhsil sahəsinin inkişafına öz töhfəsini verəcək.

ARTİ və “Bakı Beynəlxalq Dəniz Ticarət Limanı” QSC-nin (Bakı Limanı) birgə təşkilatçılığı ilə Azərbaycan Texniki Universitetinin (AzTU) “SABAH Magistratura” proqramının “Logistika və nəqliyyat” ixtisaslaşması üzrə təhsil alan tələbələr üçün təlim keçirilib. “Dəniz nəqliyyatı və Liman logistikası” adlı təlim kursu nəzəri və praktiki hissədən ibarət olub. Təlimin 1-ci hissəsi AzTU-da Bakı Limanının Təlim Mərkəzinin ixtisaslaşmış heyəti tərəfindən keçirilib və 2 həftə davam edib. Sözügedən hissədə dünyada və ölkəmizdə dəniz yolu ilə yükdaşımaların tarixi və bu daşımaları nizamlayan beynəlxalq Konvensiya sazişləri və qaydalar, dəniz daşımalarında istifadə olunan gəmilər və konteynerlər, yüklərin yüklənib-boşaldılmasında tətbiq olunan mexanizm və avadanlıqlar, yüklərin qəbulu üçün anbarların hazırlanması, dispetçer xidmətləri kimi mövzular əhatə olunub. Təlimin praktiki hissəsi isə yaxın günlərdə Ələt qəsəbəsində yerləşən limanda baş tutacaq. Səfər çərçivəsində tələbələr limanın ərazisi, terminalları və yükdaşıma əməliyyatları ilə yaxından tanış olacaqlar. Qeyd edək ki, 24 fevral 2022-ci il tarixində ARTİ ilə Bakı Limanı arasında AzTU-nun “SABAH Magistratura” proqramının tələbələrinin limanın Təlim Mərkəzində dəniz nəqliyyatı və liman logistikasını əhatə edən müxtəlif mövzularda təlim proqramlarına və istehsalat təcrübəsinə cəlb olunması ilə bağlı Anlaşma Memorandumu imzalanıb.

Azərbaycan Texniki Universiteti (AzTU) ilə "Sumqayıt Texnologiya Data Mərkəzi" MMC (STDC) arasında əməkdaşlıq çərçivəsində təlimlərə start verilib. Təlimlər 2 qrup olmaqla "Big data" və "Cisco CCNAv7" mövzuları üzrə təşkil edilib. "Big data" təlimi “STDC” MMC-nin Sistem idarəetməsi şöbəsinin aparıcı mühəndisi İlqar Hüseynov, "Cisco CCNAv7" təlimi isə İnformasiya texnologiyaları şöbəsinin bölmə rəisi Cavid İsmailzadə tərəfindən keçirilir.

Azərbaycan Texniki Universitetinin (AzTU) beynəlxalq əlaqələr üzrə prorektoru Sübhan Namazov və rektorun elmi-tədqiqat məsələləri üzrə müşaviri Fariz Məmmədov Erasmus+ KA2 proqramının “Azərbaycanda Rektorlar Konfransının yaradılması”(ECAR) layihəsi çərçivəsində “Ali təhsil sisteminin inkişafında rektorlar konfransının rolu” adlı seminarda iştirak etmək üçün İsveçə səfər ediblər. İsveçin Kral Texnologiya Universitetinin ev sahibliyi etdiyi tədbirdə Azərbaycan Respublikası təhsil nazirinin müşaviri Nicat Məmmədli, həmçinin müxtəlif ali məktəblərin rektor və ya prorektorları, eləcə də digər rəhbər şəxsləri iştirak edirlər. Tədbirdə İsveç, Litva, Finlandiya və Polşa Rektorlar Konfransının səlahiyyətli nümayəndələri, eləcə də Kral Texnologiya Universitetinin, Stokholm Universitetinin və Haaga-Helia Tətbiqi Elmlər Universitetinin rektorlarının iştirakı da nəzərdə tutulub. Qeyd edək ki, seminarın növbəti günlərində Avropa Universitetlər Birliyinin Baş katibinin müavini Monika Steinelin “Sərhədsiz Universitetlər- 2030 gələcəyə baxış” mövzusunda təqdimatı keçiriləcək.