Azərbaycan Texniki Universitetinin (AzTU) beynəlxalq əlaqələr üzrə prorektoru Fariz Məmmədov Özbəkistanın Daşkənd şəhərində “Daşkənd İrriqasiya və Kənd Təsərrüfatının Mexanikləşdirilməsi İnstitutu” (DİKTMİ) Milli Tədqiqat Universitetində təşkil olunan seminarda iştirak edib.

Tədbir Asiya İnkişaf Bankının (AİB) Mərkəzi Asiya Regional İqtisadi Əməkdaşlıq (CAREC) proqramı üzrə "Yaşıl Bacarıqların İnkişafının Gücləndirilməsi" regional texniki yardım layihəsi çərçivəsində keçirilib.

Seminarda CAREC Proqramı çərçivəsində Regional Yaşıl Kənd Təsərrüfatı Mərkəzi (RCGA) internet platformasının yaradılması və “Davamlı inkişaf üzrə yaşıl inklüziv dəyişikliklər” (Green Inclusive Change for Sustainable Development) adlı akademik modulun hazırlanması məsələləri müzakirə olunub. Tədbirdə CAREC Proqramına üzv dövlətlərin (Azərbaycan, Pakistan, Monqolustan, Özbəkistan, Türkmənistan, Qırğızıstan, Gürcüstan) və digər ölkələrin aparıcı universitetlərinin nümayəndələri, ekspertlər, eləcə də AİB-nin mütəxəssisləri iştirak ediblər.

Seminarın əsas məqsədi region ölkələri arasında yaşıl, iqlimə davamlı və rəqəmsal kənd təsərrüfatı, həmçinin yaşıl bacarıqlar istiqamətində əməkdaşlığın gücləndirilməsi, RCGA rəqəmsal platformasının inkişaf etdirilməsi və “Davamlı inkişaf üzrə yaşıl inklüziv dəyişikliklər” adlı akademik modula dair sənədlərin işlənməsi olub.

AzTU prorektoru seminarda “Dairəvi İqtisadiyyat və Resurs Səmərəliliyi” mövzusu ilə bağlı Azərbaycan Respublikasında həyata keçirilmiş layihələr və AzTU tərəfindən görülmüş işlər barədə geniş təqdimatla çıxış edib.

Seminar layihədə iştirak edən ali təhsil müəssisələri arasında yaşıl bacarıqlar sahəsində mövcud tədris, tədqiqat və akademik mübadilə imkanlarının genişləndirilməsi və yeni imkanların müəyyənləşdirilməsi baxımından faydalı olub.