Azərbaycan Texniki Universitetinin (AzTU) Xüsusi texnika və texnologiya fakültəsinin dekanı Yadullah Babayev və İnkubasiya Mərkəzinin koordinatoru Azad Musayev Çinin paytaxtı Pekində keçirilən “HICOOL 2026 Qlobal Sahibkarlar Sammiti”ndə iştirak ediblər.

Pekin Xaricdə Yaşayan İstedadlar Assosiasiyasının (Beijing Overseas Talents Association – BOTA) təşkilatçılığı ilə keçirilən sammitdə dünyanın müxtəlif ölkələrindən sahibkarlar, investorlar, aparıcı universitetlərin, elmi-tədqiqat mərkəzlərinin və innovasiya qurumlarının nümayəndələri bir araya gəlib.

Sammitdə 50 mindən çox iştirakçı təmsil olunub. Tədbir çərçivəsində təşkil olunan sərgidə yüzlərlə startap layihəsi və investisiya qurumu təqdim edilib.

Səfər çərçivəsində AzTU nümayəndə heyəti “HICOOL”un beynəlxalq əməkdaşlıq üzrə direktoru Sophie Zhang ilə görüşüb. Görüş zamanı AzTU İnkubasiya Mərkəzi ilə “HICOOL” arasında əməkdaşlıq imkanları, universitet startaplarına dəstək, gənc sahibkarların inkişafı, mentorluq proqramları və təcrübə mübadiləsi məsələləri müzakirə olunub.

Daha sonra nümayəndə heyəti “HICOOL” Sənaye Parkını ziyarət edib. Burada fəaliyyət göstərən startapların iş şəraiti, inkubasiya və inkişaf mexanizmləri ilə yaxından tanış olan nümayəndələr Pekində fəaliyyət göstərən startap təsisçiləri ilə görüşlər keçirib və “Startup Alliance” mərkəzinə baş çəkiblər.

Sammit çərçivəsində AzTU nümayəndələri Honq Konq Elm və Texnologiya Universitetinin (HKUST), Pekin Texnologiya Universitetinin (Beijing University of Technology) və Pekin Universitetinin (Peking University) sərgi stendlərini də ziyarət ediblər.

Universitet nümayəndələri ilə keçirilən görüşlərdə ali təhsil, elmi tədqiqat, innovasiya, tələbə startaplarının inkişafı və texnologiya transferi sahələrində əməkdaşlıq imkanları müzakirə olunub.