Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqı Respublika Komitəsinin təşkilatçılığı ilə Xaçmaz rayonunda yerləşən “Təhsil” İstirahət Mərkəzində “Şəhərsalma və Memarlıq İli” çərçivəsində “Şəhərsalma və Memarlıq: Gələcəyə Baxış” mövzusunda tədbir keçirilib.

“Təhsil” İstirahət Mərkəzində keçirilən tələbə düşərgəsi çərçivəsində təşkil olunan tədbirdə Azərbaycan Texniki Universitetini (AzTU) rektor Vilayət Vəliyevin rəhbərlik etdiyi nümayəndə heyəti təmsil edib.

Nümayəndə heyətində ETİHİ AzTU Tələbə Həmkarlar İttifaqı Komitəsinin sədri Mirməhəmməd Ələkbərli və tələbələr iştirak edib.

Əvvəlcə Azərbaycanın Dövlət Himni səsləndirilib. Ulu öndər Heydər Əliyevin və Azərbaycanın ərazi bütövlüyü uğrunda şəhid olan qəhrəmanların əziz xatirəsi bir dəqiqəlik sükutla yad edilib.

ETİHİ Respublika Komitəsinin sədri Araz Paşayev il ərzində komitə tərəfindən yay və qış düşərgələri, forumlar, intellektual yarışlar, idman tədbirləri, təlimlər, ekskursiyalar, mədəni proqramlar, könüllülük təşəbbüsləri və sosial layihələrin həyata keçirildiyini bildirib.

ETİHİ Respublika Komitəsinin sədri onu da vurğulayıb ki, qarşıdakı illərdə bu cür düşərgələr ixtisasyönümlü olacaq və tələbələrin asudə vaxtlarının səmərəli keçirilməsi istiqamində daha innovativ layihələr həyata keçiriləcək.

Daha sonra qonaqlar “Təhsil” İstirahət Mərkəzində ittifaq üzvlərinə yaradılmış şəraitlə tanış olublar. Sonda tələbələr və ali təhsil müəssisələrinin rəhbərləri xatirə fotosu çəkdiriblər.

Qeyd edək ki, düşərgə çərçivəsində tələbələr üçün intellektual oyunlar, futbol, voleybol, şahmat yarışları, foto və film müsabiqələri keçiriləcək.