Özbəkistanın Namanqan Dövlət Texniki Universitetinin əməkdaşları AzTU-da təcrübə keçəcəklər
Azərbaycan Texniki Universiteti (AzTU) ilə Özbəkistanın Namanqan Dövlət Texniki Universiteti arasında akademik əməkdaşlıq çərçivəsində tərəfdaş universitetin Kənd təsərrüfatı mühəndisliyi kafedrasının professor-müəllim heyəti AzTU-ya səfər edib.
Bir ay davam edəcək təcrübə proqramının məqsədi iki ali təhsil müəssisəsi arasında akademik əlaqələri inkişaf etdirmək, professor-müəllim heyətinin peşəkar bilik və bacarıqlarını artırmaq, eləcə də birgə elmi fəaliyyətin təşviqinə töhfə verməkdir.
Proqram çərçivəsində özbəkistanlı qonaqlar AzTU-nun müvafiq kafedralarının fəaliyyəti, tədris prosesinin təşkili, elmi-tədqiqat infrastrukturu və müasir tədris metodları ilə tanış olacaqlar.
Bununla yanaşı, universitetlərin professor-müəllim heyəti arasında təcrübə mübadiləsinin aparılması, mühəndisliyin müxtəlif istiqamətləri üzrə birgə elmi tədqiqatların təşkili və elmi-pedaqoji əməkdaşlığın genişləndirilməsi perspektivləri müzakirə ediləcək.
Təcrübə proqramının iki universitet arasında əməkdaşlığın daha da möhkəmləndirilməsinə və birgə elmi fəaliyyətin inkişafına töhfə verəcəyi gözlənilir.









