AzTU tələbəsinin rəhbərlik etdiyi komanda süni intellekt əsaslı şəxsi stilist mobil tətbiqi hazırlayıb

Azərbaycan Texniki Universitetinin (AzTU) Sənaye iqtisadiyyatı və menecment fakültəsinin 4-cü kurs tələbəsi Kənan Manaflının rəhbərlik etdiyi komanda şəxsi stilist funksiyasını yerinə yetirən süni intellekt əsaslı “VestoAI” mobil tətbiqini hazırlayıb.

Tətbiq istifadəçilərə qarderoblarını rəqəmsal formada idarə etmək, mövcud geyimlərindən yeni kombinasiyalar yaratmaq və şəxsi üslublarına uyğun fərdiləşdirilmiş tövsiyələr almaq imkanı verir.

“VestoAI” şəxsi stilist funksiyasını süni intellekt vasitəsilə həyata keçirən dünyada ilk mobil tətbiq kimi təqdim olunur. Layihənin məqsədi istifadəçilərə onların zövq və seçimlərinə uyğun fərdiləşdirilmiş rəqəmsal stilist təcrübəsi təqdim etməkdir.

İstifadəçilər həmçinin yaratdıqları geyim kombinasiyalarını bir kliklə dostları ilə paylaşa bilərlər.

Qeyd edək ki, “VestoAI” mobil tətbiqini "iOS" əməliyyat sistemini dəstəkləyən mobil cihazlara yükləmək mümkündür.