AzTU nümayəndə heyəti Türkiyədə keçirilən beynəlxalq konqresdə iştirak edib
Dünyanın ən böyük kosmik tədbirlərindən biri hesab olunan 77-ci Beynəlxalq Astronavtika Konqresi (IAC 2026) bu il ilk dəfə Türkiyədə təşkil olunub.
Antalya şəhərində keçirilən konqresdə Azərbaycan Texniki Universitetini (AzTU) SABAH proqramlarının Koordinasiya Mərkəzinin rəhbəri Ayçillər Aslanova, eləcə də universitetin tələbələri İlahə Kərimova, Sahib İskəndərli, Arzu Mirzəbəyova və Rəvan Hacıyev təmsil ediblər.
“Dünyanın daha çox kosmosa ehtiyacı var” şüarı ilə keçirilən tədbir çərçivəsində AzTU nümayəndə heyəti plenar və texniki sessiyalarda, həmçinin beynəlxalq sərgidə iştirak edib. Səfər zamanı kosmik sahədə fəaliyyət göstərən mütəxəssislər, şirkət və universitet nümayəndələri ilə görüşlər keçirilib, fikir mübadiləsi aparılıb və gələcək əməkdaşlıq imkanları müzakirə olunub.
Qeyd edək ki, AzTU nümayəndə heyətinin konqresdə iştirakı “Azərkosmos” ASC-nin təşkilatçılığı ilə həyata keçirilib.












