AzTU “Falling Walls Science Summit 2026” beynəlxalq elm sammitində təmsil olunub
Azərbaycan Texniki Universitetinin (AzTU) Beynəlxalq əlaqələr şöbəsinin müdiri Orxan Vətənxah Almaniyanın paytaxtı Berlində keçirilən “Falling Walls Science Summit 2026” beynəlxalq elm sammitində iştirak edib.
6–9 noyabr tarixlərində “Falling Walls Science House”da təşkil olunan sammit dünyanın müxtəlif ölkələrindən elm, ali təhsil, biznes, siyasət və vətəndaş cəmiyyəti nümayəndələrini bir araya gətirib. Hər il Berlin divarının yıxılmasının ildönümü münasibətilə keçirilən sammit elmi nailiyyətlərin təqdimatı, innovativ ideyaların təşviqi və beynəlxalq elmi əməkdaşlığın inkişafı baxımından mühüm platformalardan biridir.
Sammit çərçivəsində Orxan Vətənxah elmi və texnoloji yeniliklərə həsr olunmuş panel müzakirələrində iştirak edib, həmçinin müxtəlif ölkələrdə “Falling Walls Lab” müsabiqələrinin təşkilatçıları və beynəlxalq tərəfdaşlarla görüşlər keçirib. Görüşlər zamanı 2027-ci ildə ayrı-ayrı ölkələrdə yerli müsabiqələrin təşkili və bu istiqamətdə əməkdaşlıq imkanları müzakirə olunub.
Sammitin əsas tədbirlərindən biri gənc tədqiqatçıların və innovatorların elmi ideyalarını təqdim etdikləri “Falling Walls Lab” beynəlxalq müsabiqəsinin final mərhələsi olub. Bu il müsabiqə çərçivəsində 65 ölkədə 91 yerli seçim mərhələsi təşkil edilib və 3100-dən çox müraciət qeydə alınıb. Yerli mərhələlərin qalibləri arasından seçilmiş 100 finalçı noyabrın 6-da Berlində öz innovativ layihələrini beynəlxalq münsiflər heyətinə təqdim edib.
Finalın nəticələrinə əsasən, “Emerging Talents” kateqoriyasında birinci yerə Bern Universitetinin tədqiqatçısı Davide Scandella “cərrahi əməliyyatlar zamanı şiş sərhədlərinin müəyyənləşdirilməsi” tədqiqat layihəsi ilə layiq görülüb. İkinci yeri tekstil materiallarının təkrar emalına həsr olunmuş tədqiqat layihəsi ilə Lander Van Belleghem, üçüncü yeri isə piylənmə zamanı yağ yığılması mexanizmlərini araşdıran layihəsi ilə Franziska Paul-Shushan tutub.
Qeyd edək ki, AzTU və Alman Akademik Mübadilə Xidmətinin (DAAD) birgə təşkilatçılığı ilə “Falling Walls Lab Baku, Azerbaijan” müsabiqəsi 2026-cı ildə ikinci dəfə AzTU-da keçirilib. AzTU-nun həm yerli müsabiqəyə ev sahibliyi etməsi, həm də beynəlxalq sammitdə təmsil olunması universitetin gənc tədqiqatçıların təşviqi və beynəlxalq elmi-innovasiya platformaları ilə əlaqələrinin inkişafı istiqamətində fəaliyyətinin davamıdır.








