Azərbaycan Texniki Universitetinin (AzTU) İnkubasiya Mərkəzində SABAH qruplarının tələbələri üçün təşkil olunan “Startap Günləri” başa çatıb. İnnovasiya və Rəqəmsal İnkişaf Agentliyinin (İRİA) və “Startap Azərbaycan” platformasının tərəfdaşlığı ilə keçirilən tədbirin əsas məqsədi tələbələrin innovativ ideyalarının inkişafına dəstək vermək, startap ekosisteminə maraqlarını artırmaq və sahibkarlıq bacarıqlarının formalaşmasına töhfə vermək olub.

Tədbirin açılışında AzTU İnkubasiya Mərkəzinin koordinatoru Azad Musayev iştirakçılara “Startap Günləri”nin məqsədi, proqram çərçivəsində nəzərdə tutulan fəaliyyətlər və tələbələr üçün yaradılan imkanlar barədə məlumat verib.

AzTU-nun rektoru Vilayət Vəliyev çıxışında startapların innovasiya və texnoloji inkişafda rolunu vurğulayaraq tələbələrə uğurlar arzulayıb. Daha sonra rektorun rəqəmsal məsələlər üzrə məsləhətçisi Osman Gündüz, tədris məsələləri üzrə prorektor Sübhan Namazov, Tələbələrlə iş və sosial fəaliyyətlər şöbəsinin müdiri Rəna Cəbrayılova və İRİA-nın İnnovasiya ekosistemi departamentinin layihə meneceri Nigar Davud çıxış edərək gənclərin innovativ təşəbbüslərinin dəstəklənməsinin və startapların inkişafı üçün yaradılan imkanların əhəmiyyətindən danışıblar.

Proqramın ilk günündə iştirakçılar tərəfindən irəli sürülən 28 ideya arasından qiymətləndirmə və səsvermə yolu ilə 7 ideya seçilib. Seçilmiş ideyalar əsasında komandalar formalaşdırılıb. İştirakçılara layihələrin inkişafı, komanda işi və təqdimat bacarıqlarının təkmilləşdirilməsi istiqamətində AzMİU-nun İnnovativ Biznes İnkubatorunun rəhbəri Rasim Abdullayev, İRİA-nın İnnovasiya ekosistemi departamentinin aparıcı mütəxəssisi Vüqar Əliyev, Nihad Əhmədov, Ramazan Məhərrəmov və Şamil Namazov mentorluq ediblər.

Tədbirin ikinci günündə komandalar hazırladıqları prototipləri münsiflər heyətinə təqdim ediblər. Püşkatma əsasında müəyyənləşdirilmiş ardıcıllıqla keçirilən təqdimatlarda hər komandaya layihəsini təqdim etmək üçün 5 dəqiqə vaxt ayrılıb. Təqdimatları AzTU-nun rektoru Vilayət Vəliyev, tədris məsələləri üzrə prorektor Sübhan Namazov və SABAH qruplarının nümayəndələri də izləyiblər.

Münsiflər heyətinin tərkibində Odlar Yurdu Universitetinin Startap və İnkubasiya Mərkəzinin rəhbəri Rəvanə Göyüşlü, Azərbaycan Dövlət Neft və Sənaye Universitetinin (ADNSU) Startap və Texnologiya Transferi Ofisinin baş mütəxəssisi Aysel Sadıxova, İRİA-nın İnvestisiya və miqyaslandırma şöbəsinin baş mütəxəssisi Vüsal Süleymanlı və “Startap Azərbaycan” platformasının təmsilçisi Orxan Əhmədov yer alıblar.

Layihələrin qiymətləndirilməsi innovativlik, aktuallıq, texniki əsaslandırma, komanda işi və reallaşdırma potensialı meyarları əsasında aparılıb.

Qiymətləndirmənin nəticələrinə əsasən, oyunların idarə olunmasını və kommunikasiyanı vahid ekosistemdə birləşdirən “Oyunchu” komandası birinci, kodlaşdırmaya yeni başlayanlar üçün nəzərdə tutulmuş öyrənmə platforması “Codigo” komandası ikinci, yeni sürücülər üçün təlim platforması olan “Road Sim” komandası isə üçüncü yerə layiq görülüb.

Bundan əlavə, layihəsini ən fəal və inamlı şəkildə müdafiə edən iştirakçı kimi SABAH qruplarının birinci kurs tələbəsi, “Act 2 Lang” komandasının üzvü İqbal Mirzəyev xüsusi mükafatla təltif olunub.

Tədbirin sonunda qaliblərə qiymətli hədiyyələr, diplomlar və sertifikatlar təqdim edilib.