AzTU-da keçirilən GCGW-2026 Konfransının Qərarı qəbul edilib

Azərbaycan Texniki Universitetinin (AzTU) Türkiyənin Yıldız Texniki Universiteti ilə birgə təşkil etdiyi Qlobal İstiləşmə üzrə 14-cü Beynəlxalq Konfrans (GCGW-2026) işini yekunlaşdırıb. Konfransda 200-dən çox alim və tədqiqatçı iştirak edib. Onlardan dünyanın müxtəlif ölkələrini təmsil edən 40-dan çox xarici alim və mütəxəssis konfransa əyani şəkildə qatılıb.

GCGW-2026 qlobal istiləşmə və iqlim dəyişmələrinin elmi əsaslarının, onların ekoloji və sosial-iqtisadi təsirlərinin, eləcə də müasir mühəndislik və texnoloji həllərin müzakirəsi üçün beynəlxalq elmi platforma rolunu oynayıb. Konfrans çərçivəsində enerji, yaşıl texnologiyalar, resurslardan səmərəli istifadə və dayanıqlı inkişaf istiqamətlərində aktual tədqiqat nəticələri təqdim olunub, mövcud elmi çağırışlar və perspektiv əməkdaşlıq imkanları ətrafında müzakirələr aparılıb.

Plenar iclaslar və tematik sessiyalar müxtəlif ölkələrdən alim və mütəxəssislər arasında elmi fikir mübadiləsinə, yeni tədqiqat istiqamətlərinin müəyyənləşdirilməsinə və beynəlxalq akademik əməkdaşlıq imkanlarının müzakirəsinə şərait yaradıb.

Konfransın yekununda təqdim edilmiş elmi məqalələr, aparılmış müzakirələr və irəli sürülmüş təkliflər ümumiləşdirilərək GCGW-2026 Konfransının Qərarı qəbul edilib.