AzTU-da fakültə və kafedraların illik fəaliyyəti qiymətləndirilib
Azərbaycan Texniki Universitetində (AzTU) keyfiyyət təminatı sisteminin rəqəmsallaşdırılması, struktur bölmələrin fəaliyyətinin sistemli monitorinqi və nəticəyönümlü idarəetmə mexanizmlərinin təkmilləşdirilməsi istiqamətində növbəti qiymətləndirmə prosesi həyata keçirilib.
Universitetin fakültə və kafedraları tərəfindən 2025–2026-cı tədris ili üzrə fəaliyyət planlarının icrasına dair illik hesabatlar süni intellekt əsaslı rəqəmsal platforma üzərindən təqdim olunub.
AzTU-nun Keyfiyyətin təminatı şöbəsi tərəfindən rəqəmsal platformanın imkanlarından istifadə edilməklə fəaliyyət planları ilə təqdim edilmiş hesabatlar arasında uyğunluq təhlili aparılıb, planlaşdırılmış tədbirlərin icra vəziyyəti, müəyyən edilmiş hədəflərə nail olma səviyyəsi və fəaliyyət nəticələri qiymətləndirilib.
Qiymətləndirmə prosesində süni intellekt əsaslı təhlil imkanlarından istifadə edilməsi hesabat məlumatlarının sistemləşdirilməsinə, planlaşdırılmış və faktiki həyata keçirilmiş fəaliyyətlərin müqayisəsinə, uyğunsuzluqların və təkmilləşdirilməli istiqamətlərin müəyyənləşdirilməsinə imkan yaradıb.
Aparılmış monitorinq və qiymətləndirmənin nəticələri əsasında aşkar edilmiş çatışmazlıqlar müvafiq fakültə və kafedralarla müzakirə olunub, fəaliyyətin səmərəliliyinin artırılması, hesabatlılıq mexanizmlərinin gücləndirilməsi və müəyyən edilmiş uyğunsuzluqların aradan qaldırılması istiqamətində tövsiyələr verilib.
Eyni zamanda, qiymətləndirmə nəticələrinin 2026–2027-ci tədris ili üzrə fəaliyyət planlarının hazırlanmasında nəzərə alınması, hədəflərin konkret və ölçülə bilən göstəricilər əsasında müəyyənləşdirilməsi, fəaliyyətlərin icra müddətlərinin və gözlənilən nəticələrinin daha dəqiq planlaşdırılması tövsiyə edilib.
Süni intellekt əsaslı rəqəmsal platformanın tətbiqi AzTU-da keyfiyyət təminatı proseslərinin rəqəmsal transformasiyasına, məlumatlara əsaslanan qərarvermənin gücləndirilməsinə, monitorinq və qiymətləndirmə proseslərinin daha sistemli təşkilinə xidmət edir.
Bu təşəbbüs universitetdə PDCA (Planlaşdır–İcra et–Yoxla–Təkmilləşdir) dövrünə əsaslanan davamlı təkmilləşdirmə yanaşmasının tətbiqinə, fəaliyyətlərin planlaşdırılması, icrası, monitorinqi və qiymətləndirilməsi arasında sistemli əlaqənin qurulmasına, qiymətləndirmə nəticələrinin növbəti planlaşdırma mərhələsində nəzərə alınmasına, eləcə də institusional hesabatlılığın və keyfiyyət mədəniyyətinin gücləndirilməsinə xidmət edir.
