Azərbaycan Texniki Universitetinin (AzTU) nümayəndə heyəti Gəncə və Mingəçevir şəhərləri, eləcə də Samux rayonunda abituriyentlərlə görüşlər keçirib.

Görüşlərdə yerli təhsil idarələrinin nümayəndələri, həmçinin Müdafiə Sənayesi Nazirliyinin (MSN) “İqlim” Elmi-İstehsalat Müəssisəsinin İşə qəbul və əmək münasibətləri şöbəsinin müdiri Elvin Məmmədov və şöbənin mütəxəssisləri Cavid Əhmədov, Eşqin Yusubov iştirak ediblər.

Abituriyentlərə AzTU-nun fakültələri, ixtisasları, ikili diplom proqramları, beynəlxalq əlaqələri, yeni layihələri və kampus imkanları barədə geniş təqdimatlar edilib.

“İqlim” EİM-in əməkdaşları MSN ilə AzTU arasında mövcud əməkdaşlıq, tələbələri üçün nazirliyin müəssisələrində yaradılan karyera imkanları barədə abituriyentlərə ətraflı məlumat verib.

Qeyd olunub ki, AzTU müdafiə sənayesi üzrə regionda kadr hazırlayan aparıcı universitlərdəndir. AzTU-da müdafiə sənayesi üzrə kadrlar Xüsusi texnika və texnologiya fakültəsində hazırlanır.

Görüşlər çərçivəsində abituriyentləri maraqlandıran suallar cavablandırılıb, onların ixtisas seçimi ilə bağlı fikir mübadiləsi aparılıb.

Səfərdə AzTU-nun təhsil və metodologiyalar üzrə müşaviri İlham Pirməmmədov, Xüsusi texnika və texnologiya fakültəsinin dekanı Yadullah Babayev, Sənaye mühəndisliyi və davamlı iqtisadiyyat kafedrasının müdiri İlkin Məhərrəmov, Maşınqayırma və metallurgiya fakültəsinin beynəlxalq əlaqələr və tədqiqatlar üzrə dekan müavini Anar Hacıyev, Xüsusi texnika və texnologiya fakültəsinin sosial məsələlər, ictimaiyyətlə əlaqələr və infrastruktur üzrə dekan müavini Amin Mamedov iştirak ediblər.