Azərbaycan Respublikasının Elm və Təhsil Nazirliyi ilə Böyük Britaniyanın Kembric Universitetinin nəşriyyatı olan “Cambridge University Press” (CUP) arasında əldə edilmiş razılığa əsasən, ölkənin elm ictimaiyyəti üçün mühüm nəşr imkanları yaradılıb.

Razılaşma çərçivəsində Azərbaycanda fəaliyyət göstərən 140 elmi və ali təhsil müəssisəsinin tədqiqatçı və müəllifləri 2026-cı il də daxil olmaqla 3 il müddətində “Cambridge University Press” tərəfindən nəşr olunan və “Web of Science” və “Scopus” kimi nüfuzlu beynəlxalq elmmetrik bazalarda indekslənən 423 “Open Access” jurnalında elmi məqalələrini tam açıq əlyetərli formatda ödənişsiz dərc etdirə biləcəklər.

Müqavilənin əsas üstünlüklərindən biri müəlliflərin məqalə emalı haqqından (Article Processing Charge – APC) tam azad edilməsidir. Razılaşmanın şərtlərinə əsasən, yalnız korrespondent müəllifin Azərbaycandakı uyğun elmi və ya ali təhsil müəssisələrindən birini təmsil etməsi tələb olunur.

Məqalənin digər müəlliflərinin xarici ölkələrdən olması nəşr prosesinə və maliyyələşdirməyə təsir göstərmir və “Cambridge University Press” tərəfindən əlavə ödəniş tələb edilmir.

Bununla yanaşı, əldə olunmuş razılaşma əsasında ölkənin 140 elmi və ali təhsil müəssisəsinə sözügedən 423 jurnalın məzmununa müddətsiz oxuma hüququ təqdim edilir. Bu imkan Azərbaycan alimlərinin beynəlxalq elmi məlumat resurslarına çıxışını genişləndirəcək, elmi fəaliyyətin keyfiyyətinin yüksəldilməsinə və beynəlxalq əməkdaşlığın inkişafına töhfə verəcək.

Müəlliflər təqdim olunan imkanlardan yararlanmaq üçün “Cambridge Core” platformasına daxil olaraq müvafiq jurnalları seçə, nəşr qaydaları və tələbləri ilə tanış ola bilərlər.

https://www.cambridge.org/core/publications/journals

Bu təşəbbüs Azərbaycan elminin beynəlxalq elmi məkanla inteqrasiyasının gücləndirilməsi, ölkə alimlərinin nüfuzlu elmi jurnallarda təmsilçiliyinin artırılması və açıq elmin təşviqi istiqamətində mühüm addım hesab olunur.