Azərbaycan Texniki Universitetinin (AzTU) tərəfdaş olduğu “Erasmus+” proqramının “Azərbaycanda Rektorlar Konfransının yaradılması” (ECAR) layihəsi çərçivəsində növbəti səfər Belçikada yerləşən “EFMD Global” qurumuna təşkil olunub. 12-17 dekabr tarixlərini əhatə edən səfərin məqsədi ali təhsilin beynəlmiləlləşdirilməsində potensialın gücləndirilməsidir. Səfərdə AzTU-nu rektor Vilayət Vəliyev, ümumi işlər üzrə prorektor Fariz Mustafayev və Beynəlxalq əlaqələr şöbəsinin müdiri Orxan Vətənxah təmsil edir. Layihə çərçivəsində “EFMD Global” və digər Avropa partnyorları tərəfindən keyfiyyətin təminatı, tədqiqatın və tədrisin beynəlmiləlləşməsi, beynəlmiləlləşmə strategiyalarının inkişaf etdirilməsi, beynəlxalq layihələr kimi mühüm mövzularda seminarlar və təqdimatlar keçiriləcək. Həmçinin tədbir iştirakçılarının Avropa Komissiyasının Avropa Mədəniyyət, Təhsil və Audiovizual Agentliyi ilə “Erasmus+” layihələri üzrə işgüzar görüşünün keçirilməsi də nəzərdə tutulub. Qeyd edək ki, səfərdə Azərbaycan Respublikasının Elm və Təhsil Nazirliyinin, layihə konsorsiumunun üzvü olan Azərbaycanın 17 ali təhsil müəssisəsindən 50-ə yaxın nümayəndə heyəti - rektorlar, prorektorlar və digər məsul şəxslər, o cümlədən xarici tərəfdaşlar qismində İsveçin Kral Texnologiya Universitinin, İspaniyanın Alicante Universiteti, İspan Rektorlar Konfransının, Avropa Beynəlxalq Təhsil Assosiasiyasının, Avropa İttifaqının Tədqiqatlar və İnnovasiyalar üzrə Baş Müdirliyinin, Alman Akademik Mübadilə Xidmətinin (DAAD) nümayəndələri iştirak edirlər.    

“Karmasis Azərbaycan” şirkəti Azərbaycan Texniki Universitetinin (AzTU) tələbələri (bakalavriat və magistratura) üçün “Karmasis-in kibertəhlükəsizlik həlləri” mövzusunda məlumatlandırma sessiyası keçirib. Tədbirdə “Karmasis Azərbaycan”ın baş meneceri Berna Baysal və “Karmasis Türkiyə”nin biznes inkişaf meneceri Burak Baysal geniş təqdimatla çıxış ediblər. Berna Baysal şirkətin yaranma ideyası, fəaliyyət istiqamətləri, təklif etdiyi kibertəhlükəsizlik həlləri və biznes müştəriləri haqqında geniş məlumat verib. Burak Baysal isə Karmasis məhsulları “Infraskope SIEM++”, “Screen recorder” və “Dataskope DAM/P” haqqında ətraflı məlumat verib, bu məhsulların təyinatı, iş prinsipləri, arxitekturası, istifadəsi, rəqiblərlə müqayisədə təklif etdiyi orijinal yanaşmaların mahiyyəti barədə geniş təqdimatla çıxış edib. Daha sonra sözügedən məhsullar tələbələrə nümayiş etdirilib. Sonda tələbələri maraqlandıran suallar cavablandırılıb. Qeyd edək ki, Karmasis məhsulları əsasında AzTU tələbələri üçün peşəkar inkişaf proqramı hazırlanıb. Proqramın həyata keçirilməsi üçün zəruri infrastrukturun yaradılması və təlimçilərin hazırlanması barədə qarşılıqlı razılıq əsasında işlər aparılır.    

Müasir müstəqil Azərbaycan dövlətinin memarı və qurucusu, dünya şöhrətli siyasi xadim, xalqımızın ümummilli lideri Heydər Əliyevin vəfatından 19 il keçir.  Azərbaycan Texniki Universitetinin (AzTU) rəhbərliyi, professor-müəllim heyəti və tələbələri Fəxri xiyabanda ulu öndər Heydər Əliyevin məzarını ziyarət edib, xatirəsinə ehtiramlarını bildiriblər. Görkəmli oftalmoloq-alim, akademik Zərifə Əliyevanın da xatirəsi anılıb.

  Elm və Təhsil Nazirliyinin dəstəyi ilə Bakı Ekspo Mərkəzində Beynəlxalq STEAM Azərbaycan Festivalı 2022-nin bağlanış mərasimi keçirilib.    Bağlanış mərasimində elm və təhsil naziri Emin Əmrullayev, Azərbaycan Milli Elmlər Akademiyasının prezidenti İsa Həbibbəyli, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, digər dövlət qurumlarının rəsmiləri, millət vəkilləri, diplomatik nümayəndəliklərin təmsilçiləri, ali təhsil müəssisələrinin rəhbərləri, elmi-tədqiqat institutlarının direktorları iştirak ediblər.    Elm və təhsil naziri Emin Əmrullayev əvvəlcə qonaqları salamlayaraq festival qaliblərini təbrik edib.  Ölkəmizdə "STEAM Azərbaycan" layihəsi istiqamətində görülən işlərə dövlət tərəfindən yüksək səviyyədə dəstək göstərildiyini vurğulayan Emin Əmrullayev bu dəstəyə görə Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyevaya təşəkkür edib.  SAF 2022-yə ümumilikdə 350 komandadan 1500-dək iştirakçı qatılıb. Onlardan 127-si xarici ölkə, 1300-ü isə yerli iştirakçı olub. Əcnəbi iştirakçılar Türkiyə, Böyük Britaniya, İsveç, Estoniya, Özbəkistan, Qazaxıstan və Türkmənistanı təmsil ediblər. Azərbaycan Texniki Universitetinin (AzTU) "InTech" komandası festivalın Hackathon kateqotiyasında iştirak edərək 25 komanda arasında 3-cü yerə layiq görülüb.  Qeyd edək ki, "In-Tech" komandasının üzləri Ömər Ələsgərov,  Mirsahib Ağazadə və Kamran Mahmudov AzTU-nun "Cezeri Lab" laboratoriyasında aktiv fəaliyyət göstərirlər. Komandanın mentoru AzTU-nun rəqəmsallaşma və layihələr üzrə prorektoru Rəşad Əliyevdir. 

Azərbaycan Texniki Universitetində (AzTU) ulu öndər Heydər Əliyevin anım gününə həsr olunan tədbir keçirilib. Tədbir iştirakçıları əvvəlcə universitetin foyesində Ulu Öndərin büstünün önünə gül dəstələri düzüb, xatirəsinə ehtiramlarını bildiriblər. Anım tədbiri ümummilli liderin və torpaqlarımızın ərazi bütövlüyü uğrunda canlarından keçən Vətən övladlarının xatirəsinin bir dəqiqəlik sükutla yad edilməsi ilə başlayıb. AzTU-nun rektoru Vilayət Vəliyev ulu öndər Heydər Əliyevin Azərbaycan xalqı qarşısında böyük xidmətlərindən söz açıb. Rektor qeyd edib ki, Azərbaycanı haqlı olaraq Heydər Əliyevin şah əsəri adlandırırlar. Müasir Azərbaycanın qurucusu və memarı olan Heydər Əliyev bütün sahələrdə olduğu kimi təhsilin də inkişafına böyük önəm verib. Bu gün Azərbaycan təhsilində əldə olunan uğurlar, savadlı kadrların yetişməsi məhz Ulu Öndərin siyasətinin uğurla davam etdirilməsinin nəticəsidir. Rektor bildirib ki, ümummilli lider Heydər Əliyevin siyasi irsi, onun hadisələrə yanaşması gənclərə örnək olmalı və gələcək nəsillərə ötürülməlidir. Yeni Azərbaycan Partiyası (YAP) Yasamal rayon təşkilatının sədri Bəxtiyar Nəbiyev Ulu Öndərin Azərbaycan tarixində oynadığı mühüm roldan və xilaskarlıq missiyasından danışıb. Bildirib ki, ümummilli lider Heydər Əliyev həyatını xalqın xoşbəxt gələcəyinə həsr edib. Onun azərbaycançılıq fəlsəfəsi, dövlətçilik irsi və gördüyü böyük işlər hər zaman qürurla xatırlanacaq. Daha sonra çıxış edənlər də Heydər Əliyevin dövlət müstəqilliyinin qorunub saxlanılmasında, ölkəmizin hərtərəfli inkişafı yolunda böyük tarixi xidmətlərindən danışıblar. Qeyd olunub ki, əsrlər keçsə də Heydər Əliyevin əziz xatirəsi daim qəlblərdə yaşayacaq.    

Azərbaycan Texniki Universiteti (AzTU) Tələbə Gənclər Təşkilatı (TGT) və Azərbaycan Qan Donorluğunun İnkişafı Mərkəzinin təşkilatçılığı ilə AzTU-da qanvermə aksiyası keçirilib.  Məqsəd hemofiliya və talassemiya xəstəliklərindən əziyyət çəkən insanlar, xüsusən də uşaqlar üçün tədarük olunan qan ehtiyatını artırmaqdır. Qana ehtiyacı olanların köməyinə çatmaq üçün aksiyada tələbələr, müəllimlər və əməkdaşlar könüllü olaraq iştirak edib.   

  Azərbaycan Texniki Universitetinin (AzTU) Kitabxana İnformasiya Mərkəzi texniki elmlər sahəsində dünyanın qabaqcıl akademik bazalarından olan “Association of Computing Machine (ACM) Digital Library” rəqəmsal kitabxanasından 2024-cü ilə qədər istifadə hüququ əldə edib.AzTU Kitabxana İnformasiya Mərkəzi “ACM Rəqəmsal Kitabxana bazası”ndan istifadə hüququna Azərbaycan Kitabxana və İnformasiya Konsorsiumu ilə əməkdaşlığı çərçivəsində nail olub. Bu əməkdaşlıq nəticəsində AzTU Kitabxana İnformasiya Mərkəzi ACM-in 70 tam mətnli jurnal, 200-dən çox hər il keçirilən konfrans materialı, xəbər bülletenləri, veb-saytlar və multimedia faylları da daxil olmaqla bütün nəşr portfoliosundan istifadə imkanını istifadəçilər üçün təmin edib. “ACM Rəqəmsal Kitabxanası”nın əhatə etdiyi əsas mövzu başlıqları aşağıdakı kimidir: ·  Hesablama nəzəriyyəsi, alqoritmlər və riyaziyyat; ·  Süni intellekt, machine learning;         ·  İnformasiya sistemləri, axtarış, informasiya axtarışı, verilənlər bazası sistemləri; data mining, data science; ·  Web, mobil və multimedia texnologiyaları; ·  Tətbiqi hesablama: sənaye/biznes, fizika elmləri, təhsil, hüquq, məhkəmə ekspertizası, incəsənət/humanitar elmlər; ·  Qrafika və kompüter dəstəkli dizayn; ·  Şəbəkələr və rabitə; ·  İnfrastruktur, elektronika və robototexnika; ·  Avadanlıq (hardware); ·  Təhlükəsizlik və məxfilik; ·  Proqram mühəndisliyi və proqramlaşdırma dilləri. ACM Rəqəmsal Kitabxanasına AzTU-nun internet şəbəkəsinə bağlı olan bütün cihazlardan istifadəçi adı və kod tələb olunmadan https://dl.acm.org/ linki vasitəsilə daxil olmaq mümkündür. Baza ilə bağlı sualı olanlar [email protected] ünvanına yaza bilərlər.      

Dekabrın 8-də elm və təhsil naziri Emin Əmrullayev Almaniya Federativ Respublikasının Brandenburq Texniki Universitetinin nümayəndə heyəti ilə görüşüb.      Nazir Azərbaycan Texniki Universiteti və Brandenburq Texniki Universiteti arasında əməkdaşlıq əlaqələrinin cari vəziyyətindən məmnunluğunu ifadə edib, hər iki ali təhsil müəssisəsi arasında imzalanmış magistratura və doktorantura səviyyələrində ikili diplom proqramları haqqında müqavilələrin əhəmiyyətini vurğulayıb.    Brandenburq Texniki Universitetinin prezidenti öz növbəsində Azərbaycan Respublikasının ali təhsil müəssisələri ilə əməkdaşlıq əlaqələrinin yaradılmasında maraqlı olduqlarını bildirib.

Azərbaycan Texniki Universiteti (AzTU) və Almaniyanın Brandenburq Texniki Universiteti Cottbus-Senftenberg (BTU Cottbus-Senftenberg) arasında magistratura və doktorantura səviyyələrində ikili diplom proqramı haqqında müqavilənin imzalanması mərasimi keçirilib. Tədbirdə AzTU-nun rektoru Vilayət Vəliyev, BTU Cottbus-Senftenberg-in prezidenti, professor Gezine Grande, elm və təhsil nazirinin müşaviri Nicat Məmmədli və hər iki universitetin nümayəndələri iştirak edib. Rektor Vilayət Vəliyev AzTU-nun Almaniya universitetləri ilə uzunillik əməkdaşlığından danışıb. Bildirib ki, bu əlaqələrin inkişafına töhfə vermək məqsədilə bu yaxınlarda AzTU-da Alman mühəndislik fakültəsi açıldı. Bu gün imzalanan ikili diplom müqavilələri isə Azərbaycanda bir ilkdir. Rektor bu müqavilələrin hər iki ölkənin təhsil sahəsinin inkişafına təkan verəcəyinə ümid etdiyini deyib.   BTU Cottbus-Senftenberg-in prezidenti, professor Gezine Grande də öz növbəsində imzalanan sənədlərin universitetlər üçün əhəmiyyətindən danışıb. Qeyd olunub ki, ikili diplom proqramına qəbul olunan tələbələr hər iki universitetin diplomuna sahib olmaq imkanı əldə edəcəklər. Elm və təhsil nazirinin müşaviri Nicat Məmmədli universitetlərin beynəlmiləşməsi istiqamətində reallaşan daha bir əlamətdar hadisə münasibətilə təbriklərini çatdırıb. O, bu müqavilələrin hər iki ölkənin təhsili üçün əhəmiyyətini vurğulayıb. Qeyd edib ki, hər iki universitetin təcrübəsindən yararlanaraq birgə tədqiqatların aparılması mütəxəssis hazırlığının inkişafına müsbət təsir göstərəcək.   Daha sonra AzTU və BTU Cottbus-Senftenberg arasında magistratura və doktorantura səviyyələrində ikili diplom proqramı haqqında müqavilə imzalanıb. Məlumat üçün bildirək ki, Azərbaycanla Almaniya universitetləri arasında magistratura və doktorantura səviyyələrində ikili diplom proqramı haqqında müqavilələr ilk dəfədir imzalanır. İmzalanma mərasimindən sonra rektorlar rəhbərlik etdikləri universitetlər haqqında geniş təqdimatla çıxış ediblər.    

Azərbaycan Texniki Universitetinin (AzTU) məzunu, Vətən müharibəsində şəhidlik zirvəsinə yüksələn Murad Məmmədov 7 dekabr 1995-ci ildə Sumqayıt şəhərində anadan olub.  O, 2013-2018-ci illərdə AzTU-nun elektroenergetika mühəndisliyi ixtisasında təhsil alıb. Ali təhsilini başa vurduqdan sonra Murad Məmmədov hərbi xidmətə yollanıb. Hərbi xidmətdən qayıtdıqdan sonra “Azərişıq” ASC-də mühəndis vəzifəsində işləyib. Qardaşının Vətən müharibəsində iştirak etməsinə baxmayaraq o özü də könüllü olaraq müharibədə iştirak üçün müraciət edib. Murad Məmmədov oktyabrın 25-də Qubadlının azad olunması uğrunda gedən döyüşlərdə şəhidlik zirvəsinə yüksəlib. Prezident İlham Əliyevin sərəncamlarına əsasən, Murad Məmmədov ölümündən sonra “Vətən uğrunda” və “Laçının azad olunmasına görə” medalları ilə təltif olunub. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!