Azərbaycan Texniki Universitetində (AzTU) “İnnovativ öyrənmə-öyrətmə yanaşmaları - 1” mövzusunda təlim keçirilir. Türkiyəli mütəxəssislər professor Buket Akkoyunlu və dosent Salih Bardakçı tərəfindən aparılan təlimlərdə AzTU-nun 40-a yaxın professor-müəllim heyəti iştirak edir. Təlimin açılış mərasimində çıxış edən AzTU-nun elm və innovasiya üzrə prorektoru Sübhan Namazov professor-müəllim heyətinə uğurlar arzulayıb. Təlimin iştirakçıların fəaliyyətində faydalı olacağı qeyd olunub. Daha sonra professor Buket Akkoyunlu və dosent Salih Bardakçı təhsildə innovativ yanaşmanın tələbələrin gələcək karyeralarına təsiri, öyrətmə və öyrənmə prosesinin inkişafı və digər vacib nüansları geniş təqdimatla iştirakçıların diqqətinə çatdırıblar. Qeyd edək ki, iyunun 17-də yekunlaşacaq təlimin sonunda iştirakçılara sertifikat təqdim olunacaq.         

  13-14 iyun tarixlərində Azərbaycan Texniki Universitetinin (AzTU) Sosial məsələlər və ictimaiyyətlə əlaqələr üzrə prorektoru Kamran Rəsulov, Media ilə iş və kommunikasiya şöbəsinin müdiri Səfa Bağırov və AzTU-nun Tələbə Həmkarlar İttifaqı Komitəsinin sədri Mirməhəmməd Ələkbərli Türkiyədə işgüzar səfərdə olub. Səfər çərçivəsində İstanbul Universiteti, Yıldız Texniki Universiteti, İstanbul Aydın Universitetində görüşlər keçirilib. Görüşlər zamanı adı çəkilən universitetlərin sosial sahələrdəki fəaliyyətləri, o cümlədən tələbə və müəllimlərin sosial həyatı, tələbə təşkilatlarının iş prinsipləri, universitetlərin ictimaiyyətlə əlaqələri barədə geniş müzakirələr və fikir mübadiləsi aparılıb. Həmçinin universitetlərin kampuslarında mövcud olan texnopark, kitabxana, konqres mərkəzləri, “Klublar vadisi” kimi sosial fəaliyyət məkanlarına baxış keçirilib.             

Azərbaycan Texniki Universitetinin (AzTU) rektorunun beynəlxalq əlaqələr üzrə müşaviri Fariz Məmmədov və Xarici əlaqələr şöbəsinin müdiri Orxan Vətənxah “Erasmus+” KA1 mobillik proqramı çərçivəsində Rumıniyanın Buxarest İqtisadiyyat Universitetində səfərdədir.Səfər çəçivəsində AzTU əməkdaşları Buxarest İqtisadiyyat Universitetinin beynəlxalq əlaqələr üzrə prorektoru, professor Marius Profiroiu ilə görüşüblər.Görüşdə AzTU-da görülən işlər, həyata keçirilən layihələr, universitetin beynəlxalq əlaqələri haqqında ətraflı məlumat verilib. Həmçinin AzTU ilə Buxarest İqtisadiyyat Universiteti arasında müxtəlif istiqamətlərində əməkdaşlıq üçün yaxşı imkanların olduğu bildirilib.Buxarest İqtisadiyyat Universitetinin beynəlxalq əlaqələr şöbəsində və Dayanıqlı inkişaf üzrə tədqiqat mərkəzində keçirilən görüşlərdə isə universitetlər arasında “Erasmus+” proqramı çərçivəsində mobilliyin inkişaf etdirilməsi və birgə tədqiqatla bağlı əməkdaşlığın perspektivləri müzakirə olunub. 

İyunun 10-da Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti bölgələrə səfər çərçivəsində Yevlax Şəhər İcra Hakimiyyətinin başçısı Anar Tağıyev,  Naftalan Şəhər İcra Hakimiyyətinin başçısı Vüqar Novruzov, Göygöl Rayon İcra Hakimiyyəti başçısının I müavini Turani Əliyev, Şəmkir Rayon İcra Hakimiyyətinin başçısı Rəşad Tağıyev və Tovuz Rayon İcra Hakimiyyətinin başçısı Məmməd Məmmədovla görüşüb.  Səfərin məqsədi Nazirlər Kabinetinin təsdiq etdiyi "Şəhərdaxili hərəkət (mobillik) planının hazırlanması Qaydası"nın icrası istiqamətində müzakirələr aparmaqdır.  Görüşlər zamanı AzTU-nun rektoru Vilayət Vəliyev qərarın mahiyyəti barədə danışıb, ölkəmizdə bu sahədə aparılan işlərdə universitetlərin bilavasitə iştirakının zəruriliyini qeyd edib. Bildirib ki, burada əsas məqsəd dayanıqlı şəhər modelinin tətbiq edilməsidir. AzTU-nun Logistika və Nəqliyyat İnstitutunun direktoru Fuad Daşdəmirov şəhər mobillik planlarının hazırlanması ilə bağlı geniş təqdimatla çıxış edib, bu istiqamətdə institutda həyata keçirilən layihələrdən danışıb. Görüşlərdə, həmçinin yol hərəkətinin bütün iştirakçılarının səmərəli, təhlükəsiz və rahat hərəkətini təmin olunması ilə bağlı yaxın gələcəkdə görüləcək işlər müzakirə olunub. Eyni zamanda mobillik planı üzrə monitorinqlərin keçirilməsinin zəruriliyi qeyd olunub və bu tədbirlərlə bağlı  hədəflər müəyyən edilib. Daha sonra AzTU nümayəndə heyəti mövzu ətrafında səsləndirilən sualları cavablandırıb.         

Azərbaycan Texniki Universitetinin (AzTU) Heydər Əliyev Mərkəzində 15 iyun - Milli Qurtuluş Gününə həsr olunan tədbir keçirilib. Tədbirdə AzTU-nun rektoru Vilayət Vəliyev, Yeni Azərbaycan Partiyası (YAP) Yasamal rayon təşkilatının sədri Bəxtiyar Nəbiyev, millət vəkilləri, universitetin müəllim və tələbələri iştirak edib.Əvvəlcə universitetin foyesində ulu öndər Heydər Əliyevin büstünün önünə gül dəstələri düzülüb.Daha sonra ulu öndər Heydər Əliyevin və torpaqlarımızın ərazi bütövlüyü uğrunda canlarından keçən Vətən övladlarının xatirəsi bir dəqiqəlik sükutla yad olunub, Azərbaycanın Dövlət Himni səsləndirilib. Tədbirdə çıxış edən AzTU-nun rektoru Vilayət Vəliyev bildirib ki, Azərbaycan xalqının gələcək həyatını müəyyən edən mühüm başlanğıcların əsası 15 iyun – Milli Qurtuluş Günü ilə qoyulub. Bu əlamətdar gün ictimai, siyasi və tarixi baxımından çox böyük əhəmiyyətə malikdir. Rektor qeyd edib ki, 90-cı illərin əvvəllərində müstəqilliyini yenicə bərpa etmiş ölkədə hökm sürən hərc-mərclik, getdikcə gərginləşən siyasi, iqtisadi və sosial vəziyyət, torpaqlarımızın erməni silahlı qüvvələri tərəfindən işğalı Azərbaycanı bu bəlalardan xilas edə biləcək liderin hakimiyyətə gəlməsini zəruri edirdi. Bütün xalq bilirdi ki, həmin dövrdə ölkəni bu ağır və dözülməz vəziyyətdən xilas edəcək şəxsiyyət ulu öndər Heydər Əliyevdir. Məhz belə bir məqamda Heydər Əliyev xalqın təkidli tələbi ilə yenidən hakimiyyətə qayıtdı və ölkəmizi ağır bəlalardan xilas etdi. Ulu öndərin hakimiyyətə gəlişi ilə ölkə vətəndaş müharibəsindən və parçalanma təhlükəsindən xilas oldu. Ümummilli lider hakimiyyətə qayıdışı ilə Azərbaycanın müstəqilliyini qorudu, ölkəmizin bütün sahələrdə inkişafında, dünyada nüfuzunun artmasında mühüm və həlledici rol oynadı. Rektor onu da qeyd edib ki, bu gün ulu öndərin siyasi xəttini layiqincə davam etdirən Ali Baş Komandan, Prezident İlham Əliyevin iradəsi və qətiyyəti sayəsində Azərbaycan dünyanın ən nüfuzlu və güclü ölkələri sırasındadır.Daha sonra çıxış edən millət vəkilləri Elnur Allahverdiyev və Ramin Məmmədov, YAP Yasamal rayon təşkilatının sədri Bəxtiyar Nəbiyev, YAP-ın AzTU üzrə Ərazi Partiya Təşkilatının sədri Həbib Mirzəyev qurtuluş gününün tarixi əhəmiyyəti barədə fikirlərini bildiriblər. Qeyd olunub ki, artıq iki ildir Azərbaycan xalqı Milli Qurtuluş Gününü Ali Baş Komandan, Prezident İlham Əliyevin siyasi iradəsi nəticəsində qalib xalq kimi qeyd edir. 44 günlük Vətən müharibəsində qazanılan şanlı qələbə ilə Prezident İlham Əliyev ata vəsiyyətini yerinə yetirdi. O da vurğulanıb ki Heydər Əliyevin siyasi irsi uzun illər tarixçilər və politoloqların araşdırma mövzusu olacaq.Tərbirin sonunda AzTU-nun bir qrup əməkdaşı və tələbəsinə YAP-ın üzvlük vəsiqəsi təqdim edilib. Tələbələr adından çıxış edən AzTU-nun İqtisadiyyat və idarəetmə fakültəsinin birinci kurs tələbəsi Günay Ağabəyova YAP sıralarına qəbul olunduqları üçün partiya rəhbərliyinə təşəkkür edib.            

Azərbaycan Texniki Universitetinin (AzTU) əməkdaşlarının respublikanın şəhər və rayonlarında texniki yönümlü ixtisaslara marağı olan XI sinif şagirdləri ilə yaxından tanışlıq məqsədilə görüşləri davam edir. Növbəti tanışlıq görüşləri Bakının Yasamal, Binəqədi, Nərimanov, Nəsimi, Səbail, Qaradağ rayonlarının ümumtəhsil müəssisələrində təhsil alan XI sinif şagirdləri ilə keçirilib. Onlayn təşkil edilən görüşlərdə məktəblərin rəhbərliyi, şagirdlərin müəllimləri və valideynləri iştirak edib. Əvvəlcə AzTU-nun tanıtım videoçarxı nümayiş olunub. Daha sonra AzTU əməkdaşları universitetdə görülən işlər, həyata keçirilən yeniliklər barədə təqdimatla çıxış ediblər. Universitetin tarixi, fakültələr, ixtisaslar, beynəlxalq əlaqələr, ikili diplom proqramları, laboratoriyalar, karyera imkanları və digər vacib məlumatlar slaydlar vasitəsilə məktəblilərin diqqətinə çatdırılıb. Məktəb direktorları və müəllimlər AzTU ilə əməkdaşlıqdan məmnunluqlarını ifadə edib, həmçinin universitetin ətraflı təqdimatına görə təşəkkürlərini bildiriblər. Sonda şagirdlərin və valideynlərin sualları cavablandırılıb. Qeyd edək ki, AzTU əməkdaşlarının XI sinif şagirdləri ilə görüşləri mütəmadi olaraq davam etdiriləcək.     

İstanbul Kent Universitetində təhsil sərgisi açılıb. “Azedu Academy” təhsil mərkəzinin təşkil etdiyi sərginin keçirilməsində məqsəd Azərbaycan universitetlərinin təbliği və xarici ölkələrin tələbələrinin diqqətini ölkəmizin ali təhsil müəssisələrinə cəlb etməkdən ibarətdir.Ölkəmizin bir sıra nüfuzlu universitetlərinin təmsil olunduğu sərgidə Azərbaycan Texniki Universitetinin (AzTU) sosial məsələlər və ictimaiyyətlə əlaqələr üzrə prorektoru Kamran Rəsulov, Media ilə iş və kommunikasiya şöbəsinin müdiri Səfa Bağırov və Tələbə Həmkarlar İttifaqı Komitəsinin sədri Mirməhəmməd Ələkbərli də iştirak edir.Sərgi qardaş ölkənin mediası və təhsil ictimaiyyətinin diqqətini cəlb edib, belə tədbirin təşkil olunmasının Azərbaycan və Türkiyənin təhsil sahəsində əlaqələrinin daha da gücləndirilməsi baxımdan xüsusilə önəmli olduğu bildirilib.Ölkəmizin hüdudlarından kənarda belə tədbirlərin keçirilməsi Azərbaycan təhsilinin dünya miqyasında tanıdılması, eyni zamanda, təbliği baxımından xüsusi əhəmiyyətə malikdir.Təhsil proqramına uyğun şəkildə təşkil olunan sərgi bu gün və sabah davam edəcək.    

Azərbaycan Texniki Universitetinin (AzTU) “SABAH Magistratura” proqramının logistika və nəqliyyat ixtisaslaşması üzrə təhsil alan bir qrup tələbəsi ARTİ-nin təşkilatçılığı ilə “Azərbaycan Dəmir Yolları” QSC-nin Biləcəri stansiyasına səfər edib. Tələbələr stansiyanın sxemi ilə tanış olub və onlara görülən işlər barədə ətraflı məlumat verilib. Stansiyanın rəhbəri Elmar Məmmədov tələbələrlə söhbət zamanı bu sahədə uğur qazanmaq üçün ilk pillədən başlayaraq işə tam şəkildə yiyələnməyin vacibliyini vurğulayıb. Sonra tələbələr lokomotiv ilə stansiya ərazisinə yollanıblar. İştirakçılara qatarların gediş-gəlişinə nəzarət və onların qeydiyyata alınması, dispetçerlərin iş prosesi əyani olaraq nümayiş etdirilib. Sonra tələbələr yuyucu-buxarlayıcı stansiyada vaqonların necə təmizləndiyini izləyiblər. Son stansiyada isə tələbələrə fövqəladə hallar baş verən zaman görüləcək tədbirlər izah edilib və vaqonların təmir olunması prosesi göstərilib. Tələbələr stansiyada təşkil olunan bu dərsdənkənar fəaliyyətdə iştirak etməklə, auditoriyada qazandıqları bilik və bacarıqları praktiki cəhətdən möhkəmləndiriblər.   

Azərbaycan Texniki Universitetinin (AzTU) “SABAH” qruplarının informasiya texnologiyaları ixtisasının II kurs tələbəsi Sevinc Yaqubzadə Polşanın paytaxtı Varşavada keçirilən “Perspectywy Women in tech Summit 2022”də iştirak edib. Beynəlxalq sammit Avropada texnologiya və İT sahəsində fəaliyyət göstərən qadınların bir araya gəlməsi məqsədilə təşkil olunub. Builki sammitdə təkcə yeni texnologiyalar deyil, həmçinin iqlim böhranı və qlobal problemlərlə bağlı məslələr də müzakirə olunub. 

Azərbaycan Texniki Universitetində (AzTU) “Huawei” şirkətinin Bakı ofisinin nümayəndələri Kang Jia və Eldəniz Əliyevlə görüş keçirilib.  Görüşdə AzTU rektorunun beynəlxalq əlaqələr üzrə müşaviri Fariz Məmmədov qonaqlara universitet haqqında məlumat verib. Həmçinin AzTU-nun “Huawei”lə əməkdaşlıq əlaqələrinin inkişaf etdiriliməsində maraqlı olduğu bildirilib. “Huawei”in nümayəndələri tələbələr üçün nəzərdə tutulan “Seeds for the Future” layihəsi haqqında məlumat verib. Qeyd olunub ki, layihə çərçivəsində “Huawei” ekpertlərinin Azərbaycandan olan 30 tələbəyə İT sahəsi üzrə təlimlər verməsi nəzərdə tutulur. Daha sonra AzTU ilə “Huawei” şirkəti arasında əməkdaşlığın yeni perspektivləri müzakirə olunub, şirkətin təhsillə bağlı digər layihələri istiqamətində fikir mübadiləsi aparılıb.